Almaty qalasy Bostandyq aýdanynyń Ermensai yqshamaýdanynda ornalasqan "Jańarý" tutyný kooperativindegi zańsyz salynǵan kópqabatty taýnhaýs sot sheshimimen buzyldy. Bul týraly depýtat Baqytjan Bazarbek málimdedi, dep habarlaidy Dalanews.kz.
Jer ýchaskesi bastapqyda sharýa qojalyǵyn júrgizý jáne baý-baqsha ósirý maqsatynda berilgen. Alaida menshik iesi bul talapty elemei, eki qabatty turǵyn úi salyp, zańnamany buzǵan. Sottyń sheshimine sáikes, nysan zańsyz dep tanylyp, májbúrli túrde súrildi.
Súrý jumystary kezinde menshik iesi ózin-ózi órtemek bolyp, memlekettik sot oryndaýshysyn iterip, arandatýshylyq áreketterge barǵan.
Baqytjan Bazarbektiń aitýynsha, Almaty qalalyq memlekettik arhitektýra-qurylys baqylaý basqarmasymen (GASK) birlesip, taýly aimaqtaǵy zańsyz salynǵan turǵyn úilerdi súrý jumystary jalǵasady.
"Jerge quqyqsyz, ruqsatsyz jáne qurylys qujattarynsyz salynǵan nysandar zań aiasynda jaýapkershilikke tartylady", – dedi depýtat.
Eske salaiyq, buǵan deiin májilis depýtaty Baqytjan Bazarbek taǵy bir zańsyzdyqty áshkerelegen edi.
"Qapshaǵai sý qoimasy men Ile ózeniniń sý qorǵaý beldeýlerinde ornalasqan 82 jer ýchaskesi jeke jáne zańdy tulǵalardyń menshigine rásimdelip ketken! Al mundai jerlerdi jekeshelendirýge zańmen tyiym salynǵan! Jer kodeksi men Sý kodeksi boiynsha sý qorǵaý aimaqtary men erekshe qorǵalatyn tabiǵi aýmaqtar (EQTA) ainalymǵa shyǵarylmaýy tiis. Biraq bul ýchaskeler jeke menshik retinde tirkelgeni anyqtaldy", - dedi ol.
"Sý jaǵalaýy beton dýaldarmen qorshalǵan. Bul – azamattardyń sý resýrstaryna erkin qol jetkizý quqyǵyn óreskel buzý! Men, Májilis depýtaty, jer salasynyń sarapshysy retinde, bul máselege bei-jai qarai almaimyn. Jerler memleketke qaitarylýǵa tiis! Zańsyz berilgen ýchaskelerdi kimniń iemdenip alǵany anyqtalady. Artynda laýazymdy, yqpaldy tulǵalar tursa da, zań bárine ortaq!" - dedi depýtat.
