Almatyda 5 myńnan astam quqyqbuzýshy qoǵamdyq oryndarda kalán shekkeni úshin jazalandy,- dep habarlaıdy Dalanews.kz
Jańa zańnamalyq normalar kúshine engennen beri Almatyda shegilmeıtin temeki ónimderiniń, sonyń ishinde veıpter men hosh ıistendirgishterdiń zańsyz aınalymyna baılanysty shamamen 30 qylmystyq is qozǵaldy. Polısıa qyzmetkerleri 25 myńnan astam veıpti tárkiledi. Bul týraly Almaty qalalyq polısıa departamentiniń resmı ókili Saltanat Ázirbek Óńirlik komýnıkasıalar qyzmetindegi baspasóz konferensıasynda málimdedi.
«Veıpter men basqa da nıkotın ónimderiniń zańsyz aınalymyna qylmystyq jaýapkershilik belgileý – azamattardyń densaýlyǵyn qorǵaýdaǵy mańyzdy qadam», – dedi ol.
Onyń aıtýynsha, endi veıpterdi zańsyz ákelý jáne óndirý úshin 2 myń AEK-ke deıin aıyppul, túzeý jumystary nemese 2 jylǵa deıin bas bostandyǵyn shekteý jazasy qarastyrylǵan. Eger qylmystyq top áreket etse nemese asa iri tabys tapqan jaǵdaıda, jaza 5 jylǵa deıin bas bostandyǵynan aıyrý jáne 5 myń AEK (18,46 mln teńge) mólsherinde aıyppul salý túrinde qoldanylady.
Sonymen qatar, 2024 jyly Almatyda qoǵamdyq oryndarda kalán shekkeni úshin 5514 adam ákimshilik jaýapkershilikke tartyldy. Polısıa qyzmetkerleri mekeme ıelerine zań talaptaryn saqtaý týraly 458 uıǵarym jiberdi.
«Zańnyń oryndalýyna baqylaý kúsheıtiletin bolady. Azamattardy belgilengen erejelerdi saqtaýǵa shaqyramyz, sebebi bul – óz densaýlyǵyńyz ben aınalańyzdaǵy adamdardyń qaýipsizdigi úshin mańyzdy», – dep atap ótti polısıa ókili.
Almatyda temeki ónimderiniń, veıpter men kalándardyń zańsyz satylýyna qarsy kúres jalǵasýda. Polısıa ókilderi qatań sharalar quqyqbuzýshylyq sanyn azaıtyp, jastardyń densaýlyǵyn qorǵaýǵa kómektesetinine senimdi.
