Almatyda túsirilim kezinde 50 adamnyń kómirtek totyǵynan ýlanýyna vagon ishindegi jylytý júiesi sebep bolǵan, dep habarlaidy Dala News.
Bul týraly kólik ministri Nurlan Saýranbaev málimdedi.
«Túsirilim júrgizgen kompaniia jeke vagonmen kelisim jasaǵan. Vagon ishinde sýyq bolǵandyqtan, olar jylytý júiesin ornatqan, alaida ol qandai da bir jolmen ishke kómirtek totyǵyn bólgen. Bul – tolyqtai qoldan jasalǵan júie. Qazir tergeý aiaqtalýǵa jaqyn, vagon ieleri qatań jaýapkershilikke tartylady», – dedi ministr.
Onyń aitýynsha, oqiǵadan keiin poiyz birden paidalanýdan shyǵarylǵan.
«Bul jerde naqty zań buzýshylyq bar. Ýlaný faktisi dáleldengen, endi ony quqyqtyq turǵyda rásimdeý qajet», – dep atap ótti Saýranbaev.
Eske salsaq, 2025 jyldyń jeltoqsanynda Almatyda poiyzdaǵy túsirilim kezinde 50 adam ýlanǵan. Onyń ishinde eki bala jansaqtaý bólimine túsken, taǵy toǵyzy toksikologiia bólimine jatqyzylǵan.
