Úsh kúnge sozylatyn aýqymdy mádenı is-sharany Qazaqstan Respýblıkasy Mádenıet jáne sport mınıstrligi, Ulttyq memlekettik kitap palatasy jáne Almaty qalasynyń ákimdigi uıymdastyryp otyr. Kitap jármeńkesine jaqyn shet elden keletin baspagerler men arnaıy delegasıa (Qyrǵyzstan, Reseı), otandyq 50-den astam baspa mekemesi men kitap dúkeni qatysady.
Búgingi tańda elimizdiń baspa isi salasy qarqyndy túrde damyp keledi. Jármeńke aıasynda jańa baǵytta, zamanaýı tehnologıalarmen shyqqan kitaptardyń tanystyrylymy ótip, avtorlar, baspagerler bas qosady.
«Almaty kitap jármeńkesiniń» maqsaty – baspa mekemeleri men kitap dúkenderiniń saýdasyn jandandyrý, kitap naryǵyndaǵy túıtkildi máselelerdiń oń sheshilýine úles qosyp, kitap mádenıetiniń damýyna serpin berý; oqyrman men avtor arasyndaǵy baılanysty nyǵaıtyp, kitap oqý mádenıetin qalyptastyrý jolynda dánekerlik tanytý jáne sheteldik áriptestermen tájirıbe almasý alańyn uıymdastyrý.
Jármeńke aıasynda qala turǵyndary men qonaqtary izdegen kitabyn taýyp qana qoımaı, túrli mádenı is-sharalardyń kýási bolady. Aqyndar, óleńge talasy bar oqýshylar jyrdan shashý shashyp, otandyq estrada merekelik konsert beredi. Qabyrǵaly aqyn-jazýshylar kitaptarynyń tusaýkeserin jasap, qoltańba berý rásimin ótkizedi.
Qalamgerlerdiń kóshin bastaıtyn jazýshy Rollan Seısenbaev qoltańba berýmen qatar satylymnan túsken qarajatty qaıyrymdylyq qoryna aýdarýdy kózdep otyr.
Demek, jármeńkege qatysyp, qajetti kitabyn satyp alǵan qala turǵyndary men qonaqtary qaıyrymdy iske de muryndyq bola alady.
Qonaqtar men turǵyndar arasynda túrli ıntellektýaldyq suraq-jaýap oıyndary oınatylyp, jeńimpazdarǵa kitap toly qorjyndar syıǵa beriledi. Jármeńkege qatysatyn baspa mekemeleri men kútip dúkenderi oqýshylar, jastar men men stýdentterge baspa ónimin arzan baǵada satyp alýǵa túrli jeńildikter jasaıdy.
Ulttyq memlekettik kitap palatasyndaǵy «Sırek kitaptar men qoljazbalar murajaıynyń» eksponattary da jármeńke aıasynda kópshilik nazaryna usynylady. Munda Alash arystarynyń, ult qaıratkerleriniń HİH ǵasyr sońy men HH ǵasyr basynda jaryq kórgen kitaptarynyń túpnusqasymen tanysý múmkindigi qarastyrylǵan.
Ult rýhanıatynyń aıtýly kúnderinde baspa isi, kitap saýdasy, jáne qazirgi balalar ádebıetiniń damý baǵyty jóninde dóńgelek ústelder ótip, osy salanyń mamandary atalǵan máseleni jan-jaqty talqylaıdy.
Kitap jármeńkesiniń ashylýyna Qazaqstan Respýblıkasy Mádenıet jáne sport mınıstri Abaeav Dáýren Áskerbekuly, Almaty qalasynyń ákimi Dosaev Erbolat Asqarbekuly, Qazaqstan Jazýshylar odaǵy basqarmasynyń tóraǵasy Ulyqbek Esdáýlet jáne ózge de ádebıet, mádenıet salasynyń kórnekti ókilderi qatysady.
BAQ ókilderine qosymsha aqparat: Qazaqstan Respýblıkasynyń Ulttyq memlekettik kitap palatasy 8-727-397-61-15, 8 747 334 55 01, 8 707 829 2044
