Almatyda qala ákimi Darhan Satybaldynyń tóraǵalyǵymen Tuńǵysh Prezident saiabaǵyn keshendi qaita qurý máselesine arnalǵan keńes ótti. Jiynǵa qala basqarmalarynyń ókilderi, sáýletshiler, landshaft dizainerleri jáne qurylys uiymdarynyń mamandary qatysty,- dep habarlaidy Dalanews.kz
Qoǵamdyq keńistikti damytý basqarmasy basshysynyń m.a. Batyrhan Súleimenovtyń málimetinshe, saiabaq 2010 jyly ashylǵan. Onyń aýmaǵy 15 myńnan astam aǵash otyrǵyzylǵan alleialar men dendrologiialyq aimaqtarǵa bólingen. Qazirgi ýaqytta qoldanystaǵy avtomatty sýarý júiesi tek jartylai jumys istep tur, sondyqtan ony tolyq jańǵyrtý qajet. Zamanaýi tehnologiiany qoldanyp, sý aǵyzý qubyrlaryn tazartyp, sýarý júiesin tolyq jańartý josparlanyp otyr.
Jańartý jobasy saiabaqty ornyqty kógaldandyrý tujyrymdamasyn qamtidy. Atap aitqanda, aǵash pen butanyń túrin kóbeitý, alýan túrli shóptesin ósimdikterden turatyn ekojúieler men jasyl aimaqtar qurý kózdelgen. Olardyń arasynda 4 gektar aýmaqta qaraǵai men qaiyńnan turatyn toǵai da bar. Sonymen qatar 5,5 myńnan astam gúldeitin aǵash egý kózdelgen.
Qala ákimi jobalyq sheshimderdi naqtylap, kógaldandyrý júiesiniń ornyqtylyǵyn qamtamasyz etýdi, sýarý infraqurylymyn jańartýdy jáne saiabaqtyń tabiǵatty qorǵaý qyzmetin kúsheitýdi tapsyrdy. Basty maqsat dendrosaiabaqtyń ekologiialyq mańyzy joǵary aimaq retindegi mártebesin saqtaý jáne onyń rekreatsiialyq áleýetin damytý.
