الماتىدا قالا اكىمى دارحان ساتىبالدىنىڭ توراعالىعىمەن تۇڭعىش پرەزيدەنت ساياباعىن كەشەندى قايتا قۇرۋ ماسەلەسىنە ارنالعان كەڭەس ءوتتى. جيىنعا قالا باسقارمالارىنىڭ وكىلدەرى، ساۋلەتشىلەر، لاندشافت ديزاينەرلەرى جانە قۇرىلىس ۇيىمدارىنىڭ ماماندارى قاتىستى،- دەپ حابارلايدى Dalanews.kz

قوعامدىق كەڭىستىكتى دامىتۋ باسقارماسى باسشىسىنىڭ م.ا. باتىرحان سۇلەيمەنوۆتىڭ مالىمەتىنشە، ساياباق 2010 جىلى اشىلعان. ونىڭ اۋماعى 15 مىڭنان استام اعاش وتىرعىزىلعان اللەيالار مەن دەندرولوگيالىق ايماقتارعا بولىنگەن. قازىرگى ۋاقىتتا قولدانىستاعى اۆتوماتتى سۋارۋ جۇيەسى تەك جارتىلاي جۇمىس ىستەپ تۇر، سوندىقتان ونى تولىق جاڭعىرتۋ قاجەت. زاماناۋي تەحنولوگيانى قولدانىپ، سۋ اعىزۋ قۇبىرلارىن تازارتىپ، سۋارۋ جۇيەسىن تولىق جاڭارتۋ جوسپارلانىپ وتىر.

جاڭارتۋ جوباسى ساياباقتى ورنىقتى كوگالداندىرۋ تۇجىرىمداماسىن قامتيدى. اتاپ ايتقاندا، اعاش پەن بۇتانىڭ ءتۇرىن كوبەيتۋ، الۋان ءتۇرلى شوپتەسىن وسىمدىكتەردەن تۇراتىن ەكوجۇيەلەر مەن جاسىل ايماقتار قۇرۋ كوزدەلگەن. ولاردىڭ اراسىندا 4 گەكتار اۋماقتا قاراعاي مەن قايىڭنان تۇراتىن توعاي دا بار. سونىمەن قاتار 5،5 مىڭنان استام گۇلدەيتىن اعاش ەگۋ كوزدەلگەن.

قالا اكىمى جوبالىق شەشىمدەردى ناقتىلاپ، كوگالداندىرۋ جۇيەسىنىڭ ورنىقتىلىعىن قامتاماسىز ەتۋدى، سۋارۋ ينفراقۇرىلىمىن جاڭارتۋدى جانە ساياباقتىڭ تابيعاتتى قورعاۋ قىزمەتىن كۇشەيتۋدى تاپسىردى. باستى ماقسات دەندروساياباقتىڭ ەكولوگيالىق ماڭىزى جوعارى ايماق رەتىندەگى مارتەبەسىن ساقتاۋ جانە ونىڭ رەكرەاسيالىق الەۋەتىن دامىتۋ.