Áleýmettik jelide qazaqtarǵa til tigizgen Violetta Parshinaǵa qatysty qylmystyq is qozǵaldy. Bul týraly Almaty qalasy Politsiia departamenti málimdedi, dep habarlaidy Dalanews.kz.
Politsiia málimetinshe, azamatsha P.-nyń jeke basy anyqtalyp, ol politsiiaǵa jetkizilgen. Qazirgi ýaqytta onyń áreketterine Qazaqstan Respýblikasynyń qoldanystaǵy zańnamasyna sáikes quqyqtyq baǵa berilip jatyr.
"Mundai áreketterge jol berilmeidi jáne olarǵa qaǵidatty túrde quqyqtyq baǵa beriledi. Tulǵanyń mártebesine jáne ózge de jaǵdailarǵa qaramastan, ulttyq belgisi boiynsha qorlaý faktilerine jol bergen barlyq azamat zańda belgilengen tártippen jaýapkershilikke tartylady", – delingen resmi habarlamada.
Sondai-aq politsiia ultaralyq kelisimdi buzýǵa baǵyttalǵan kez kelgen áreketter, arandatýshylyq jáne alaýyzdyqty qozdyratyn materialdardy taratý faktileri qatań túrde toqtatylatynyn eskertti.
Qazirgi ýaqytta tergeý amaldary jalǵasyp jatyr.
Eske salaiyq, buǵan deiin áleýmettik jelilerde Almaty turǵyny Violettanyń qazaqtarǵa qatysty qorlaityn sózder aitqan jazbasy taraǵan edi. Ol Threads platformasynda Jeltoqsan oqiǵasyna qatysýshylardy "topastar", "mambetter", "aýyldan kelgender" dep kemsitken.
Bul jaǵdai qoǵamda úlken rezonans týǵyzyp, jeli qoldanýshylary onyń áreketine quqyqtyq baǵa berýdi talap etti. Keiin onyń jumysynan bosatylǵany habarlanǵan.
