الەۋمەتتىك جەلىدە قازاقتارعا ءتىل تيگىزگەن ۆيولەتتا پارشيناعا قاتىستى قىلمىستىق ءىس قوزعالدى. بۇل تۋرالى الماتى قالاسى پوليسيا دەپارتامەنتى مالىمدەدى، دەپ حابارلايدى Dalanews.kz.
پوليسيا مالىمەتىنشە، ازاماتشا پ.-نىڭ جەكە باسى انىقتالىپ، ول پوليسياعا جەتكىزىلگەن. قازىرگى ۋاقىتتا ونىڭ ارەكەتتەرىنە قازاقستان رەسپۋبليكاسىنىڭ قولدانىستاعى زاڭناماسىنا سايكەس قۇقىقتىق باعا بەرىلىپ جاتىر.
"مۇنداي ارەكەتتەرگە جول بەرىلمەيدى جانە ولارعا قاعيداتتى تۇردە قۇقىقتىق باعا بەرىلەدى. تۇلعانىڭ مارتەبەسىنە جانە وزگە دە جاعدايلارعا قاراماستان، ۇلتتىق بەلگىسى بويىنشا قورلاۋ فاكتىلەرىنە جول بەرگەن بارلىق ازامات زاڭدا بەلگىلەنگەن تارتىپپەن جاۋاپكەرشىلىككە تارتىلادى"، – دەلىنگەن رەسمي حابارلامادا.
سونداي-اق پوليسيا ۇلتارالىق كەلىسىمدى بۇزۋعا باعىتتالعان كەز كەلگەن ارەكەتتەر، ارانداتۋشىلىق جانە الاۋىزدىقتى قوزدىراتىن ماتەريالداردى تاراتۋ فاكتىلەرى قاتاڭ تۇردە توقتاتىلاتىنىن ەسكەرتتى.
قازىرگى ۋاقىتتا تەرگەۋ امالدارى جالعاسىپ جاتىر.
ەسكە سالايىق، بۇعان دەيىن الەۋمەتتىك جەلىلەردە الماتى تۇرعىنى ۆيولەتتانىڭ قازاقتارعا قاتىستى قورلايتىن سوزدەر ايتقان جازباسى تاراعان ەدى. ول Threads پلاتفورماسىندا جەلتوقسان وقيعاسىنا قاتىسۋشىلاردى "توپاستار"، "مامبەتتەر"، "اۋىلدان كەلگەندەر" دەپ كەمسىتكەن.
بۇل جاعداي قوعامدا ۇلكەن رەزونانس تۋعىزىپ، جەلى قولدانۋشىلارى ونىڭ ارەكەتىنە قۇقىقتىق باعا بەرۋدى تالاپ ەتتى. كەيىن ونىڭ جۇمىسىنان بوساتىلعانى حابارلانعان.
