Qańtar oqiǵasy kezinde qalalyq ákimdik ǵimaraty men prezident rezidentsiiasyn basyp alǵandar sottaldy, - dep habarlaidy Dalanews.kz.
Almaty qalasynyń qylmystyq ister jónindegi mamandandyrylǵan aýdanaralyq sotynda 11 sottalýshyǵa, jappai tártipsizdikter men shabýyldarǵa qatysqandaryna, kúzetiletin obektiler jáne olardy basyp alý, sondai-aq bilik ókilderine qarsy zorlyq-zombylyq qoldanýǵa (272-bap,269-1-bap 3-bap 380-bap) qatysty qylmystyq is qaraldy.
2022 jyldyń 4-5 qańtarynda sottalýshylar jappai tártipsizdikterge qatysyp, qorǵalatyn obektilerge – Almaty qalasynyń ákimdigine, Prezident rezidentsiiasyna, politsiia bólimine zańsyz kirdi. Sottalýshylardyń qylmystyq áreketteri saldarynan múlikter qirap, zardaptary aýyr bolǵan.
Tártipsizdik barysynda úsh sottalýshy qoǵamdyq tártip ornatý jóninde sharalar qabyldaǵan áskeri qyzmetshiler men quqyq qorǵaý organdarynyń qyzmetkerlerine zorlyq-zombylyq kórsetti.
Al, sottalýshylardyń bireýi eki áskeri kýrsantty tutqynǵa alyp, olarǵa jeńil dene jaraqattaryn keltirgen. Sottalýshylar kinásin jartylai moiyndady.
Qandai jaza taǵaiyndaldy?
Bul qylmystar aýyr jáne asa aýyr qylmystar sanatyna jatady.Jaza taǵaiyndaý kezinde sot jaýapkershilikti jeńildetetin jaǵdailardy eskerdi: sottalýshylardyń kámeletke tolmaǵan balalarynyń bolýyn, densaýlyq jaǵdailaryn, otbasylyq jaǵdailaryn jáne buryn sotty bolmaǵandaryn.
Joǵaryda aitylǵandardy eskere otyryp, sot 10 sottalýshyny QK 272-babynyń 2-bóligi, 380-babynyń 3-bóligi, 269-babynyń 3-bóligi-1), 4), tarmaqshalary boiynsha kináli dep tapty. "Raqymshylyq týraly" QR Zańy qoldanyla otyryp, olardyń árqaisysy 1 jylǵa 9 aiǵa bas bostandyǵynan aiyryldy.Bir sottalýshy QK 272-babynyń 2-bóligi, 380-babynyń 3-bóligi, 1), 4) tarmaqtary, 269-1-babynyń 3-bóligi, 261-babynyń 3-bóligi boiynsha kináli dep tanyldy, oǵan "Raqymshylyq týraly" QR Zańy qoldanyla otyryp, 4 jylǵa bas bostandyǵynan aiyrý jazasy qoldanyldy.
Úkim zańdy kúshine engen joq.
