Алматыда Қаңтар оқиғасы кезінде әкімдік пен резиденцияны басып алғандар сотталды

Көркем Алдабергенова 11 мау. 2024 16:13 2023

Қаңтар оқиғасы кезінде қалалық әкімдік ғимараты мен президент резиденциясын басып алғандар сотталды, - деп хабарлайды Dalanews.kz.

Алматы қаласының қылмыстық істер жөніндегі мамандандырылған ауданаралық сотында 11 сотталушыға, жаппай тәртіпсіздіктер мен шабуылдарға қатысқандарына, күзетілетін объектілер және оларды басып алу, сондай-ақ билік өкілдеріне қарсы зорлық-зомбылық қолдануға (272-бап,269-1-бап 3-бап 380-бап) қатысты қылмыстық іс қаралды.
 
2022 жылдың 4-5 қаңтарында сотталушылар жаппай тәртіпсіздіктерге қатысып, қорғалатын объектілерге – Алматы қаласының әкімдігіне, Президент резиденциясына, полиция бөліміне заңсыз кірді. Сотталушылардың қылмыстық әрекеттері салдарынан мүліктер қирап, зардаптары ауыр болған.
Тәртіпсіздік барысында үш сотталушы қоғамдық тәртіп орнату жөнінде шаралар қабылдаған әскери қызметшілер мен құқық қорғау органдарының қызметкерлеріне зорлық-зомбылық көрсетті.
 
Ал, сотталушылардың біреуі екі әскери курсантты тұтқынға алып, оларға жеңіл дене жарақаттарын келтірген. Сотталушылар кінәсін жартылай мойындады.
 
Қандай жаза тағайындалды?
 
Бұл қылмыстар ауыр және аса ауыр қылмыстар санатына жатады.Жаза тағайындау кезінде сот жауапкершілікті жеңілдететін жағдайларды ескерді: сотталушылардың кәмелетке толмаған балаларының болуын, денсаулық жағдайларын, отбасылық жағдайларын және бұрын сотты болмағандарын.
 
Жоғарыда айтылғандарды ескере отырып, сот 10 сотталушыны ҚК 272-бабының 2-бөлігі, 380-бабының 3-бөлігі, 269-бабының 3-бөлігі-1), 4), тармақшалары бойынша кінәлі деп тапты. "Рақымшылық туралы" ҚР Заңы қолданыла отырып, олардың әрқайсысы 1 жылға 9 айға бас бостандығынан айырылды.
 
Бір сотталушы ҚК 272-бабының 2-бөлігі, 380-бабының 3-бөлігі, 1), 4) тармақтары, 269-1-бабының 3-бөлігі, 261-бабының 3-бөлігі бойынша кінәлі деп танылды, оған "Рақымшылық туралы" ҚР Заңы қолданыла отырып, 4 жылға бас бостандығынан айыру жазасы қолданылды.
Үкім заңды күшіне енген жоқ.

Ұсынылған
Соңғы жаңалықтар