Almatyda politseiler qala kóshelerinde tyiym salynǵan zattarǵa qatysty jarnamalyq jazbalar qaldyrǵan er adamdy qolǵa túsirdi, dep habarlaidy Dalanews.kz.
Túrksib aýdandyq politsiia basqarmasynyń málimetinshe, 1998 jyly týǵan azamat turǵyn úilerdiń qabyrǵalary men qorshaýlarǵa «esirtki jarnamalaryn» jazyp júrgen. Ol mundai jazbalardy internet arqyly “tapsyryspen” oryndap, ár jazbasy úshin aqsha alyp otyrǵan.
Tártip saqshylary ony vandalizm áreketi kezinde, dál ústinen túsip ustaǵan. Tekserý barysynda er adamnyń sómkesinen boiaý ballondary, trafaretter jáne zańsyz áreketterin dáleldeitin hat almasýlary bar uialy telefon tabylyp, tárkilendi.
«Atalǵan derek boiynsha QR Qylmystyq kodeksiniń 299-1-baby (“Esirtki zattaryn nasihattaý nemese zańsyz jarnamalaý”) boiynsha is qozǵaldy. Bul bapqa sáikes, naqty bas bostandyǵynan aiyrý jazasy qarastyrylǵan. Qazir is materialdary sotqa joldandy», – dedi Túrksib aýdandyq politsiia bóliminiń bastyǵy Dáýlet Seitqulov.
Onyń aitýynsha, mundai áreketterdi jai «qyzyǵýshylyq» nemese kóshe graffitige teńeýge bolmaidy.
«Qabyrǵadaǵy mundai jazbalar — tek sýret emes, esirtkiniń taralýyna úles qosý degen sóz. Bul qylmystyq jaýapkershilikke ákeledi. Biz mundai quqyqbuzýshylyqtardyń aldyn alý boiynsha júieli jumys júrgizip jatyrmyz. Azamattardy da belsendi bolýǵa shaqyramyz: eger osyndai jazbalardy baiqasańyz, dereý politsiiaǵa habarlasyńyz. Qalamyzdy esirtki qaýipinen tek birlesip qorǵai alamyz», – dedi ol.
