Oqý jyly aiaqtalǵannan keiin Almatyda mektep janyndaǵy lagerler jumysyn bastaidy. Qazirgi ýaqytta megapolistegi 200-den astam mektep olardy ashýǵa belsendi daiyndyq júrgizip jatyr, dep habarlaidy Dalanews.kz
Ata-analar balasyn lagerge mektep ákimshiligine júginý arqyly tirkei alady. Lagerlerge barý tolyqtai tegin.
Balalar úshin mazmundy jazǵy demalys baǵdarlamasy ázirlenip jatyr. Lagerlerde balalar ziiatkerlik jáne shyǵarmashylyq oiyndarǵa, sporttyq jarystarǵa, viktorinalarǵa, pikirsaiys klýbtaryna, jazǵy til mektepteri men «Jas ulan», «Jas qyran» baǵdarlamalary boiynsha sabaqtarǵa qatysa alady. Lagerler jaz mezgilinde jumys isteidi. Naqty jumys kestesin mektep ákimshiliginen naqtylaý qajet.
«Ár mektep jazǵy baǵdarlamasyn ázirleidi. Mysaly, alty mektep janynan ulttyq dástúrmen jaqyn tanysýǵa, sándik-qoldanbaly óner men qolóner negizderin úirenýge múmkindik beretin kiiz úidegi etnolager uiymdastyrylady. 24 mektepte fýtbol, voleibol, basketbol jáne ulttyq sport túrleri boiynsha jarystar ótedi. 50 mektepte oqýshylardyń ekologiialyq mádenietin jáne tabiǵatqa sanaly kózqarasyn damytýǵa baǵyttalǵan ekologiialyq lager jumys isteidi. Jalpy, 200-den astam mektep bazasynda jazǵy mektep janyndaǵy lager uiymdastyrylady. Ata-analar lagerge barý úshin aqy tólemeidi», – dedi Almaty qalasy Bilim basqarmasynyń basshysy Sairan Saifedenov.
Sairan Saifedenov balalardyń qaýipsizdigi máselesine erekshe kóńil bólinetinin de atap ótti. Barlyq lager meditsinalyq kabinettermen jabdyqtalady. Mektep direktorlarymen sanitarlyq-epidemiologiialyq baqylaý basqarmasy jáne Tótenshe jaǵdailar departamenti ókilderiniń qatysýymen jinalystar ótkizildi. Sonymen qatar, balalar úshin sý aidynynda, jolda, saiabaqta jáne qoǵamdyq orynda ózin ustaý erejeleri boiynsha aldyn alý sabaqtary uiymdastyrylady.
Buǵan qosa, jaz mezgilinde qalada kóshpeli jáne beiindi lager de uiymdastyrylady. «Shabyt» jáne «Samǵaý» ortalyqtary, №1 Oqýshylar úii jáne eki innovatsiialyq shyǵarmashylyq ortalyǵy sekildi bes qosymsha bilim berý mekemesiniń bazasynda ǵylymǵa, eksperimentterge jáne jobalyq qyzmetke baǵyttalǵan IT-lager jumysyn bastaidy. Oqýshylar saraiy jáne basqa mekemeler janyndaǵy kúndizgi lagerde shahmat, vokal, bi, kúres jáne basqa da baǵyttar boiynsha sabaqtar ótkiziledi.
Jazǵy lagerlerden bólek, jaz boiy balalarǵa qosymsha bilim beretin uiymdar da jumys isteidi. Memlekettik bilim berý tapsyrysy aiasynda 11 myńǵa jýyq oqýshy 122 jeke menshik bilim berý uiymynda sabaqqa tegin qatysady.
Sondai-aq, qalalyq kolledjder bazasynda kásiptik baǵdar berý baǵytyndaǵy sektsiialar uiymdastyrylady. «Jaz – bolashaq mamandyqpen» jobasy aiasynda oqýshylar 17 kolledj bazasynda aspazdyq, kiim dizainy, shashtaraz isi jáne basqa da mamandyq boiynsha ózin synap kóre alady.
