Ál-Farabı atyndaǵy Qazaq Ulttyq ýnıversıtetinde belgili jýrnalıs, Qazaqstannyń eńbek sińirgen qaıratkeri, «Parasat» ordeniniń ıegeri Nurtileý Imanǵalıuly atyndaǵy oqý-shyǵarmashylyq zerthana ashyldy.
Arnaıy aýdıtorıanyń ashylý saltanatyna Aqparat jáne qoǵamdyq damý mınıstri Aıda Balaeva, Ál-Farabı atyndaǵy QazUÝ rektory Janseıit Túımebaev, Nurǵalı Imanǵalıulynyń otbasy músheleri, sondaı-aq memlekettik jáne komersıalyq BAQ ókilderi qatysty.
«Búgin Nurtileý Imanǵalıulynyń qurmetine arnalǵan kezekti is-sharanyń kýási bolyp otyrmyz. Bul – zıaly azamatqa degen qoǵamnyń úlken qurmetin kórsetedi», - dedi A.Balaeva.
Aıta keteıik, buǵan deıin N.Imanǵalıuly atyndaǵy jýrnalısıka fakúltetiniń stýdentterine arnalǵan arnaıy bilim berý stependıasy taǵaıyndalsa, Parlament Senaty «Amanat» baıqaýy aıasynda arnaıy premıa taǵaıyndady, sondaı-aq televızıa ardagerleri arasynda voleıboldan týrnır uıymdastyryldy.
N.Imanǵalıuly týraly Mınıstr A.Balaeva óz sózinde:
«Qazaq televızıasy salasynda ózindik mektep qalyptastyra bildi. Ózine qarap boı túzegen jas jýrnalıser qatarynan qanshama býyn shákirt tárbıeledi. Ómiriniń sońǵy aılaryna deıin, aýrý janyna batyp júrse de, jýrnalısıkadan ketken joq. Túrli habarlarǵa shyǵyp, oı-pikirin bildirip júrdi. Óz kásibine degen adaldyq, jýrnalısıkaǵa degen qurmet osylaı kórinedi», — dedi.
Áriptesteri men jaqyndary Nurtileý Imanǵalıulyn jyly esteliktermen eske alyp, onyń búkil jasampaz ómirin telejýrnalısterdiń damýyna arnaǵanyn, jastar redaksıasynan «Qazaqstan «RTRK» AQ Basqarma tóraǵasyna deıingi úlken eńbek jolyn júrip ótkenin atap ótti.
Eńbek jolynda birqatar úkimettik nagradalardy, «Qazaqstannyń eńbek sińirgen qaıratkeri» qurmetti ataǵyna ıe bolyp, «Parasat» ordenimen, «Eren eńbegi úshin» medalimen, Qazaqstan Respýblıkasy Prezıdentiniń Qurmet gramotasymen marapattalǵan bolatyn.
