ءال-فارابي اتىنداعى قازاق ۇلتتىق ۋنيۆەرسيتەتىندە بەلگىلى جۋرناليست، قازاقستاننىڭ ەڭبەك سىڭىرگەن قايراتكەرى، «پاراسات» وردەنىنىڭ يەگەرى نۇرتىلەۋ يمانعالي ۇلى اتىنداعى وقۋ-شىعارماشىلىق زەرتحانا اشىلدى.
ارنايى اۋديتوريانىڭ اشىلۋ سالتاناتىنا اقپارات جانە قوعامدىق دامۋ ءمينيسترى ايدا بالايەۆا، ءال-فارابي اتىنداعى قازۇۋ رەكتورى جانسەيىت تۇيمەبايەۆ، نۇرعالي يمانعالي ۇلىنىڭ وتباسى مۇشەلەرى، سونداي-اق مەملەكەتتىك جانە كوممەرسيالىق ب ا ق وكىلدەرى قاتىستى.
«بۇگىن نۇرتىلەۋ يمانعالي ۇلىنىڭ قۇرمەتىنە ارنالعان كەزەكتى ءىس-شارانىڭ كۋاسى بولىپ وتىرمىز. بۇل – زيالى ازاماتقا دەگەن قوعامنىڭ ۇلكەن قۇرمەتىن كورسەتەدى»، - دەدى ا.بالايەۆا.
ايتا كەتەيىك، بۇعان دەيىن ن.يمانعالي ۇلى اتىنداعى جۋرناليستيكا فاكۋلتەتىنىڭ ستۋدەنتتەرىنە ارنالعان ارنايى ءبىلىم بەرۋ ستەپەندياسى تاعايىندالسا، پارلامەنت سەناتى «امانات» بايقاۋى اياسىندا ارنايى پرەميا تاعايىندادى، سونداي-اق تەليەۆيزيا ارداگەرلەرى اراسىندا ۆولەيبولدان تۋرنير ۇيىمداستىرىلدى.
ن.يمانعالي ۇلى تۋرالى مينيستر ا.بالايەۆا ءوز سوزىندە:
«قازاق تەليەۆيزياسى سالاسىندا وزىندىك مەكتەپ قالىپتاستىرا ءبىلدى. وزىنە قاراپ بوي تۇزەگەن جاس جۋرناليستەر قاتارىنان قانشاما بۋىن شاكىرت تاربيەلەدى. ءومىرىنىڭ سوڭعى ايلارىنا دەيىن، اۋرۋ جانىنا باتىپ جۇرسە دە، جۋرناليستيكادان كەتكەن جوق. ءتۇرلى حابارلارعا شىعىپ، وي-پىكىرىن ءبىلدىرىپ ءجۇردى. ءوز كاسىبىنە دەگەن ادالدىق، جۋرناليستيكاعا دەگەن قۇرمەت وسىلاي كورىنەدى»، — دەدى.
ارىپتەستەرى مەن جاقىندارى نۇرتىلەۋ يمانعاليۇلىن جىلى ەستەلىكتەرمەن ەسكە الىپ، ونىڭ بۇكىل جاسامپاز ءومىرىن تەلەجۋرناليستەردىڭ دامۋىنا ارناعانىن، جاستار رەداكسياسىنان «قازاقستان «رترك» اق باسقارما ءتوراعاسىنا دەيىنگى ۇلكەن ەڭبەك جولىن ءجۇرىپ وتكەنىن اتاپ ءوتتى.
ەڭبەك جولىندا ءبىرقاتار ۇكىمەتتىك ناگرادالاردى، «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىنا يە بولىپ، «پاراسات» وردەنىمەن، «ەرەن ەڭبەگى ءۇشىن» مەدالىمەن، قازاقستان رەسپۋبليكاسى پرەزيدەنتىنىڭ قۇرمەت گراموتاسىمەن ماراپاتتالعان بولاتىن.
