Almatyda eń iri ári adam eń kóp baratyn qoǵamdyq keńistikterdiń biri – Tuńǵysh Prezident saiabaǵyn keshendi qaita jańǵyrtý jumystary bastalady. Bul týraly Qoǵamdyq keńistikterdi damytý basqarmasynyń ókilderi aitty, dep habarlaidy Dalanews.kz.
Joba tabiǵi landshaftty, sáýlettik sheshimderdi jáne demalysqa, serýendeýge, belsendi ómir saltyna arnalǵan qolaily infraqurylymdy úilestiretin zamanaýi, jaily ári kópfýnktsiialy orta qurýǵa baǵyttalǵan. Saiabaq 2010 jyly ashylǵannan beri aýmaqta kúrdeli jańǵyrtý júrgizilmegen. Qazirgi tańda infraqurylymnyń bir bóligi zamanaýi jailylyq pen fýnktsionaldyq talaptarǵa sai júieli jańartýdy qajet etedi.
Saiabaq Bostandyq aýdanynda, ál-Farabi dańǵyly men Dýlati kóshesiniń boiynda, Ile Alataýynyń baýraiynda ornalasqan. Jalpy aýmaǵy shamamen 62,4 gektar. Keńistikte ortalyq alleia, sýburqaqtar kesheni, amfiteatr, serýen aimaqtary men velojoldar, sondai-aq taýǵa panoramalyq kórinis ashylatyn demalys oryndary bar.
Qaita jańǵyrtý barysynda tabiǵi ortany saqtaý, jasyl jelek qoryn damytý jáne kelýshilerdiń barlyq sanaty úshin qolaily infraqurylym qurýǵa basymdyq beriledi. Joba aiasynda kireberis aimaǵy jańartylyp, júrginshiler baǵyty kóriktendiriledi, demalys oryndary jańaryp, jańa fýnktsionaldyq keńistikter jasaqtalady.
Jańǵyrtý tujyrymdamasy britandyq landshaft sáýletshileriniń jáne el mamandarynyń qatysýymen ázirlenip, kórkeitýdiń úzdik halyqaralyq tájiribesine negizdelgen. Negizgi maqsat tabiǵat, sáýlet jáne zamanaýi demalys, qarym-qatynas pen qalalyq is-sharalarǵa arnalǵan múmkindikter úilesim tapqan saiabaq qalyptastyrý.
Qurylys jumystary búkil aýmaqty tolyq jappai, kezeń-kezeńimen júrgiziledi. Alǵashqy kezeńde negizgi jumystar bastalatyn saiabaqtyń ońtústik bóligi ýaqytsha jabylady. Al ortalyq bólikten kireberis arkaǵa deiingi aýmaq kelýshiler úshin ashyq ári qoljetimdi bolyp qalady.
Birinshi kezeń aiaqtalǵan soń jańartylǵan bólik qaita ashylyp, jumys kelesi aýmaqta jalǵasady. Osylaisha, qaita jańǵyrtý barysyna qarai saiabaqtyń jekelegen aimaqtary kezeń-kezeńimen paidalanýǵa beriledi.
Jobany iske asyrý aýmaqtyń biregei tabiǵi áleýetin saqtaýǵa jáne joǵary sapaly qalalyq orta standarttaryna sai zamanaýi qoǵamdyq keńistik qurýǵa múmkindik beredi.
