الماتىدا ەڭ ءىرى ءارى ادام ەڭ كوپ باراتىن قوعامدىق كەڭىستىكتەردىڭ ءبىرى – تۇڭعىش پرەزيدەنت ساياباعىن كەشەندى قايتا جاڭعىرتۋ جۇمىستارى باستالادى. بۇل تۋرالى قوعامدىق كەڭىستىكتەردى دامىتۋ باسقارماسىنىڭ وكىلدەرى ايتتى، دەپ حابارلايدى Dalanews.kz.
جوبا تابيعي لاندشافتتى، ساۋلەتتىك شەشىمدەردى جانە دەمالىسقا، سەرۋەندەۋگە، بەلسەندى ءومىر سالتىنا ارنالعان قولايلى ينفراقۇرىلىمدى ۇيلەستىرەتىن زاماناۋي، جايلى ءارى كوپفۋنكسيالى ورتا قۇرۋعا باعىتتالعان. ساياباق 2010 جىلى اشىلعاننان بەرى اۋماقتا كۇردەلى جاڭعىرتۋ جۇرگىزىلمەگەن. قازىرگى تاڭدا ينفراقۇرىلىمنىڭ ءبىر بولىگى زاماناۋي جايلىلىق پەن فۋنكسيونالدىق تالاپتارعا ساي جۇيەلى جاڭارتۋدى قاجەت ەتەدى.
ساياباق بوستاندىق اۋدانىندا، ءال-فارابي داڭعىلى مەن دۋلاتي كوشەسىنىڭ بويىندا، ىلە الاتاۋىنىڭ باۋرايىندا ورنالاسقان. جالپى اۋماعى شامامەن 62،4 گەكتار. كەڭىستىكتە ورتالىق اللەيا، سۋبۇرقاقتار كەشەنى، امفيتەاتر، سەرۋەن ايماقتارى مەن ۆەلوجولدار، سونداي-اق تاۋعا پانورامالىق كورىنىس اشىلاتىن دەمالىس ورىندارى بار.
قايتا جاڭعىرتۋ بارىسىندا تابيعي ورتانى ساقتاۋ، جاسىل جەلەك قورىن دامىتۋ جانە كەلۋشىلەردىڭ بارلىق ساناتى ءۇشىن قولايلى ينفراقۇرىلىم قۇرۋعا باسىمدىق بەرىلەدى. جوبا اياسىندا كىرەبەرىس ايماعى جاڭارتىلىپ، جۇرگىنشىلەر باعىتى كورىكتەندىرىلەدى، دەمالىس ورىندارى جاڭارىپ، جاڭا فۋنكسيونالدىق كەڭىستىكتەر جاساقتالادى.
جاڭعىرتۋ تۇجىرىمداماسى بريتاندىق لاندشافت ساۋلەتشىلەرىنىڭ جانە ەل ماماندارىنىڭ قاتىسۋىمەن ازىرلەنىپ، كوركەيتۋدىڭ ۇزدىك حالىقارالىق تاجىريبەسىنە نەگىزدەلگەن. نەگىزگى ماقسات تابيعات، ساۋلەت جانە زاماناۋي دەمالىس، قارىم-قاتىناس پەن قالالىق ءىس-شارالارعا ارنالعان مۇمكىندىكتەر ۇيلەسىم تاپقان ساياباق قالىپتاستىرۋ.
قۇرىلىس جۇمىستارى بۇكىل اۋماقتى تولىق جاپپاي، كەزەڭ-كەزەڭىمەن جۇرگىزىلەدى. العاشقى كەزەڭدە نەگىزگى جۇمىستار باستالاتىن ساياباقتىڭ وڭتۇستىك بولىگى ۋاقىتشا جابىلادى. ال ورتالىق بولىكتەن كىرەبەرىس اركاعا دەيىنگى اۋماق كەلۋشىلەر ءۇشىن اشىق ءارى قولجەتىمدى بولىپ قالادى.
ءبىرىنشى كەزەڭ اياقتالعان سوڭ جاڭارتىلعان بولىك قايتا اشىلىپ، جۇمىس كەلەسى اۋماقتا جالعاسادى. وسىلايشا، قايتا جاڭعىرتۋ بارىسىنا قاراي ساياباقتىڭ جەكەلەگەن ايماقتارى كەزەڭ-كەزەڭىمەن پايدالانۋعا بەرىلەدى.
جوبانى ىسكە اسىرۋ اۋماقتىڭ بىرەگەي تابيعي الەۋەتىن ساقتاۋعا جانە جوعارى ساپالى قالالىق ورتا ستاندارتتارىنا ساي زاماناۋي قوعامدىق كەڭىستىك قۇرۋعا مۇمكىندىك بەرەدى.
