Bilim basqarmasynyń málimetinshe, qazirgi tańda qalada 77261 balany qamtityn 910 mektepke deiingi uiym jumys isteidi, onyń ishinde 193 memlekettik (39 214 bala) jáne 717 jekemenshik (38 047 bala). 2 jastan 6 jasqa deiingi balalardy mektepke deiingi tárbiemen jáne oqytýmen qamtý – 71,9%, 3-6 jas – 92,9% quraidy.
«Mektepke deiingi uiymdarda kezektiń uzaq bolýyna, ishki kóshi-qonnyń júrýine jáne jyl saiyn týý kórsetkishiniń artýyna bailanysty mektepke deiingi uiymdardaǵy oryndarǵa degen qajettilik óte ózekti bolyp qala beredi. Osy oraida Almaty qalasy ákimdigi memlekettik balabaqshalardy ashý baǵytynda aýqymdy jumystar atqaryp jatyr», – dedi Á.Saǵieva.
Baiandamashy 2022-2024 jyldar aralyǵynda 16 myńnan astam orynǵa 188 jekemenshik balabaqsha (2022 jyly – 6 myń orynǵa 60 balabaqsha, 2023 jyly – 4950 orynǵa 71 balabaqsha, 2024 jyly – 5540 oryndyq 57 balabaqsha) ashý josparlanyp otyrǵanyn atap ótti.
Sonymen qatar, 2022 jyly kezekte turý máselesin kezeń-kezeńmen qysqartý jáne balalardy mektepke deiingi tárbiemen qamtýdy arttyrý maqsatynda Jas Qanat yqsham aýdanynda 280 oryndyq balabaqsha salynýda, sondai-aq Jetisý aýdanynda 280 oryndyq balabaqsha satyp alyndy.
2023 jyly Áýezov aýdanynda 720 oryndyq 3 balabaqsha salý, 240 oryndyq balabaqsha satyp alý josparlanýda. 1380 oryndyq 5 balabaqshanyń qurylysy 2024 jylǵa josparlanǵan.
600 oryndyq taǵy 2 balabaqshanyń qurylysy 2025 jylǵa josparlanǵan.
Sonymen qatar, jýrnalisterdiń suraqtaryna jaýap bergen Á.Saǵieva qaladaǵy mektepke deiingi uiymdarda mamandar tapshylyǵy máselesin de atap ótti.
«Tárbieshiler tapshylyǵy shamamen 35-40 paiyzdy quraidy, onyń ishinde mamandandyrylǵan mektepke deiingi bilim berý uiymdary bar, sonymen qatar logoped, defektolog, mýzykalyq jetekshi, medbike, esepshi, tárbieshi kómekshisi siiaqty mamandar qajet», - dedi Á.Saǵieva.
