Almatyda sintetikalyq esirtkini zańsyz saqtap, taratty degen kúdikpen jas jigit qolǵa tústi, dep habarlaidy Dala News.
Ustaý is-sharasy esirtki qylmysyna qarsy is-qimyl basqarmasy men Áýezov aýdandyq politsiia basqarmasy qyzmetkerleriniń birlesken jedel-izdestirý sharalary barysynda júrgizilgen. Politsiia qyzmetkerlerin kórgen sátte kúdikti tyiym salynǵan zattan qutylýǵa áreket jasaǵanymen, dereý ustalǵan.
Tekserý barysynda odan ózine tán iisi bar untaq tárizdi zat salynǵan oramdar tárkilendi. Sot-saraptama qorytyndysyna sáikes, alynǵan zat sintetikalyq esirtki – mefedron bolyp shyqqan.
Atalǵan derek boiynsha qylmystyq is qozǵaldy. Qazirgi ýaqytta qylmystyń barlyq mán-jaiyn, yqtimal sybailastardy jáne esirtki taratý arnalarynyń bar-joǵyn anyqtaýǵa baǵyttalǵan tergeý áreketteri júrgizilýde.
Almaty qalalyq politsiia departamentiniń esirtki qylmysyna qarsy is-qimyl basqarmasynyń bastyǵy Murat Jumabaev bul baǵyttaǵy jumystar erekshe baqylaýda ekenin atap ótti.
«Biz jastardy esirtkiniń zańsyz ainalymyna tartýdyń kez kelgen áreketin júieli túrde toqtatamyz. Satý tásili men qoldanylatyn tehnologiiaǵa qaramastan, mundai qylmystar úshin jaýapkershilik qatań ári bultartpas», – dedi ol.
Onyń aitýynsha, megapoliste esirtki qylmystaryn anyqtaý jáne jolyn kesý jumystary júieli negizde jalǵasady.
«Árbir osyndai derek – azamattarymyzdyń densaýlyǵy men bolashaǵyna tóngen naqty qaýip. Politsiia qoǵamdy esirtki qaterinen qorǵaý úshin barlyq qajetti sharany qabyldai beredi», – dep túiindedi basqarma basshysy.
