Almatyda kúzetshini kóligimen ádeii qaǵyp óltirgen adam – burynǵy depýtat jáne prokýratýrada istegen adamnyń uly. Bul týraly jýrnalist Mihail Kozachkovqa turǵyn úi turǵyndary aitqan, - dep habarlaidy Dalanews.kz.
Turǵyndardyń sózinshe, jantúrshigerlik qylmysty Asqar Tastandiev esimdi turǵyn jasaǵan.
«Gýgldaǵy málimet boiynsha, Asqar Tastandiev esimdi 1979 jyly týǵan kásipker, memlekettik satyp alýǵa qatysýshy bar. Quzyrly organdaǵylar bul aqparatty áli rastamady.
Eger meniń derekkózderim qatelespegen bolsa, Almatyda kúzetshini óltirgen adam – burynǵy depýtat jáne prokýratýranyń qyzmetkeri bolǵan», - deidi jýrnalist Mihail Kozachkov.
Aita keteiik, buǵan deiin Almatydaǵy elitaly turǵyn úidiń birinde aýyr qylmys bolǵanyn habarlaǵan edik. Sol úidiń turǵyny kúzetshini birneshe ret kóligimen ádeii soǵyp, artynsha tópelep uryp tastaǵan.
Oqiǵa qaladaǵy "Merkýr Taýn" turǵyn úiinde bolǵan. Turǵyndardyń sózinshe, kúzetshige shabýyl jasaǵan er adam uzaq jyldar boiy ata-anasymen osy turǵyn úi kesheninde turady. Turǵyndar er adamnyń nashaqorlyqqa shaldyqqanyn aitady. Sol túni ol úiine kelgen. Kúzetshi qaqpany jaba bastaǵanda, djip mingen er adam ony birneshe ret ádeii qaǵyp jibergen. Artynsha er adam kólikten túsip, kúzetshini ura bastaidy. Bul aýyr qylmys "Merkýr Taýn" turǵyn úi kesheniniń turǵyndarynyń kózinshe bolǵan.
Kúzetshi aýyr jaǵdaida aýrýhanaǵa jetkizildi. Er adam aýrýhanada kóz jumdy.
"Er adam kúzetshini djippen birneshe ret soǵyp, sodan keiin kólikten túsip, er adamdy sabap, basynan tepken. Osydan keiin kóligin qoiyp, úiine qaitqan. Kúzetshiniń tamyrlary jyrtylyp, aiaǵy julynyp, ókpesi ezilip, jansaqtaý bóliminde kóz jumdy", - deidi úi turǵyny.
Marqum bolǵan kúzetshiniń artynda úsh balasy qaldy.
Bul oqiǵaǵa Almaty Politsiia departamenti pikir bildirdi. Olardyń málimetinshe, adam óltirý deregi boiynsha qylmystyq is qozǵalǵan.
"Aldyn ala málimet boiynsha, turǵyn úi kesheniniń kúzetshisi men turǵyny arasynda janjal shyǵyp, nátijesinde 45 jastaǵy er adam kúzetshiniń ómirine sáikes kelmeitin dene jaraqattaryn keltirip, kúdikti ustalyp, ýaqytsha qamaýǵa alyndy. Qylmystyń basqa da mán-jailary anyqtalyp jatyr", - dep habarlady Almaty PD baspasóz qyzmeti.
