Almatyda jol jóndeý jumystary bastalady. Osyǵan bailanysty qalalyq mobildilik basqarmasy basshysynyń orynbasary Asan Bostanov jiektastardy aýystyrý máselesine qatysty túsinikteme berdi, – dep habarlaidy Dalanews.kz
1 maýsymnan bastap qalada ortasha jol jóndeý jumystary bastalady. Biyl jalpy uzyndyǵy 300 shaqyrym bolatyn 367 kóshe jóndeýden ótpek. Sonymen qatar, Raiymbek batyr jáne Jeltoqsan kósheleri boiynda BRT jelilerin salý jalǵasyp jatyr.
«Jiektas máselesine jeke toqtalǵym keledi – bul taqyryp árdaiym turǵyndardy alańdatady. Ortasha jóndeý barysynda da, BRT jelisin salý kezinde de jiektastardy ishinara aýystyrý qarastyrylǵan. Bul tehnologiialyq turǵydan qajet qadam. Jalpy alǵanda, granit jiektastar uzaq merzimge shydaidy, alaida kólik qozǵalysy qarqyndy qalada olar jol-kólik oqiǵasy nemese aýyr tehnikanyń soǵylýy saldarynan jii zaqymdanady. Sondyqtan jańa asfalt tóseý aldynda jiektastar tegisteledi, biiktigi retteledi. Synbaǵan, jaramdy jiektastar qaita qoldanylady. Al syzat, jaryq, mehanikalyq zaqym nemese standarttan aýytqý bar elementter ǵana aýystyrylady. Ortasha jóndeý kezinde qala boiynsha orta eseppen jiektastardyń 3-5 paiyzy ǵana jańartylady», - dedi Asan Bostanov.
Onyń aitýynsha, BRT jobalary aiasynda merdiger uiymdar 7 jyldyq kepildik mindettemelerdi oryndaidy. Olar jol tóseminiń, jaiaý júrginshiler aimaǵy men jiektastardyń sapasyna tolyq jaýap beredi.
«Raiymbek batyr dańǵyly boiyndaǵy BRT jelisin salý kezinde joldyń geometriialyq parametrleri túzetiledi – keibir bólikteri keńeitilip, keibiri tarylady. Sondai-aq, qoǵamdyq kólik aialdamalary mańynda qaýipsizdik aralshalary ornatylady. Bul ózgerister jaǵdaiyna qaramastan qazirgi granit jiektastardy alyp tastaýdy talap etedi. Sol kezde barlyq jiektastar suryptalady. Aqaýy joq, qaita paidalanýǵa jaramdy tastar tegistelip, qaita ornatylady. Buǵan qosa, qurylys-montaj jumystary bastalmai turyp, tehnikalyq jáne avtorlyq qadaǵalaý tarapynan dańǵyl boiyndaǵy jiektastarǵa vizýaldy tekserý júrgizildi. Sonyń nátijesinde biiktigi men sapasy talapqa sai kelmeitin, zaqymdanǵan jáne pishini ózgergen bólikter anyqtalyp, olardy aýystyrý kózdelip otyr», - dedi qalalyq mobildilik basqarmasynyń orynbasary.
