Almatyda Jeltoqsan kóshesi boiymen qozǵalystyń jańa júiesi engiziledi. Uzyndyǵy 4,6 shaqyrym bolatyn jańa jeli Timiriazev kóshesindegi qoldanystaǵy BRT ýchaskesi men Raiymbek batyr dańǵyly boiynda salynyp jatqan aýmaqty jalǵap, ońtústikten soltústikke qarai úzdiksiz jyldam avtobýs qatynasyn qamtamasyz etedi, dep habarlaidy Dalanews.kz
Júrgizýshilerge jol erejelerin qatań saqtap, joldaǵy tańbalar men belgilerge muqiiat nazar aýdarý qajet. Atalǵan aýmaqta quqyqbuzýshylyqty baqylaýǵa alatyn foto jáne beine tirkeý júieleri de jumys isteidi.
Joba aiasynda arnaiy jolaqtar jol boiynyń shetinde ornalastyrylǵan. Mundai sheshim turaqta turǵan kólikter men keptelisten bolatyn qolaisyzdyqtardy azaitýǵa múmkindik beredi. Soltústik baǵytqa qozǵalǵanda bólingen jolaq kósheniń oń jaǵynda, al keri baǵytta sol jaǵynda syzylǵan. Jeke avtokólikter úshin Abai dańǵylynan soltústikke qarai burynǵydai birjaqty qozǵalys tártibi jáne jolaq sany saqtalady.
Jańa baǵyttar boiynsha avtobýstar 14 jeltoqsannan bastap eki baǵytta da qatynai bastaidy. Alǵashqy kezeńde №92 jáne №59 marshrýttaryn iske qosý josparlanyp otyr. Marshrýttardyń naqty syzbasy men qozǵalys kestesi keiinirek jariialanady.
Aita keterligi, joba aiasynda barlyq jolaýshyǵa qolaily bolýy úshin arnaiy kóterińki platformasy bar zamanaýi aialdama keshenderi ornatyldy. Sonymen qatar eki qabat asfalt tóselip, baǵdarshamdar, jol belgileri, jaryqtandyrý júiesi jańartylyp, trotýar plitkalary arqyly júrginshiler aimaǵy kóriktendirildi.
