2023 jyldyń basynda Almatyda jastar arasyndaǵy jumyssyzdyq deńgeıi 5,6%-dan asqan bolatyn. 2024 jyldyń ekinshi toqsanynyń derekterine sáıkes, bul kórsetkish 4,5% bolyp, jumyssyzdyq deńgeıi 1,1%-ǵa tómendegeni baıqaldy. Muny qalalyq jastar saıasaty basqarmasy habarlady.
Olardyń málimetinshe, Almatydaǵy kolejder men joǵary oqý oryndarynyń 65 myń túleginiń 60-80%-y jyl saıyn Almatydan jumys tabýǵa tyrysady. Sonymen qatar, 10-12 myń túlek jyl boıy jumys izdeıdi.
Jastar saıasaty basqarmasy NEET sanatyndaǵy jastardyń (Not in Education, Employment, or Training) úlesin azaıtýǵa baǵyttalǵan baǵdarlamany ázirledi. Bul sanatqa jumyssyz, oqymaıtyn jáne kásibı daıyndyqtan ótpegen 14 pen 35 jas aralyǵyndaǵy jastar jatady.
Atalǵan baǵdarlamany júzege asyrý nátıjesinde NEET-jastardyń úlesi 2023 jyldyń birinshi toqsanyndaǵy 8,3%-dan (53,8 myń adam) 2024 jyldyń ekinshi toqsanynda 6,5%-ǵa (42,8 myń adam) deıin tómendedi.
Almaty ákimi Erbolat Dosaevtyń tapsyrmasymen megapolıste bir jyldan astam ýaqyt boıy Qalalyq karera ortalyǵy jumys istep keledi. 2023 jyldyń aqpan aıynan beri ortalyqqa 4 myńnan astam jas júgingen. Ortalyq 3 myń adamdy jumyspen qamtýǵa kómek kórsetip, suranysqa ıe mamandyqtar boıynsha 30-dan astam qysqa merzimdi kýrstar ashty. Bıyl jyl basynan beri 4,8 myń jas oqýdan ótip, olardyń 3 myńy jumysqa ornalasyp, 1,8 myńy taǵylymdamadan ótip jatyr.
NEET-jastarǵa arnalǵan Jasalmaty.kz mobıldi qosymshasy iske qosyldy, onda Jobfair365 jumyspen qamtý jáne SkillBrigde oqytý servısteri usynylǵan. Aqparattyq portal 20 myń adamdy tartty. Jumys bastalǵannan beri Qazaqstannyń 20 óńirinen 3 myńnan astam jumys berýshi tirkelip, 5 myńnan astam bos jumys orny jarıalandy. Sonyń nátıjesinde 2,5 myń jas jumysqa ornalasty.
2024 jyly basqarma «8 Kúndik karera» is-sharasyn uıymdastyryp, oǵan 450-den astam iri kompanıa qatysty. Sonyń nátıjesinde 2,8 myńnan astam jas jumys tapty.
«Jasyl el» ulttyq jobasy aıasynda 2,1 myń adam ýaqytsha jumysqa ornalasty. Sonymen qatar, Eńbek mobıldiligi ortalyǵy arqyly 4,8 myń jas jumysqa ornalastyryldy.
«Almaty qalasynyń 2024 jylǵy jumys oryndaryn qurýdyń óńirlik kartasy» aıasynda jastarǵa 18,1 myń jumys orny usynyldy. Enbek.kz portaly arqyly 1,1 myń jas jumysqa ornalastyryldy.
Osylaısha, 2024 jyldyń qańtarynan beri barlyǵy 31,3 myń adam jumysqa ornalasty, onyń ishinde Almaty qalalyq jastar saıasaty basqarmasy arqyly 13,3 myń jas jumyspen qamtyldy.
Qalanyń damý josparynyń Jol kartasynda kórsetilgen jumyspen qamtý boıynsha KPI (jospar – 10 myń) 3 esege artyq oryndaldy.
Aıta keteıik, Almatyda 14 pen 35 jas aralyǵyndaǵy 695,6 myńnan astam jas (qala halqynyń 32%-y) turady, olardyń 421,6 myńy – jumys isteıtin jastar, 279 myńy – joǵary oqý oryndary men kolejderdiń stýdentteri, 80 myńy – joǵary synyp oqýshylary.
