Almatyda Memleket basshysy Qasym-Jomart Toqaevtyń bastamasymen baspanaǵa ie bolǵan jas ǵalymdar jańa páterlerine qonystandy. Páterler Ǵylym qyzmetkerleri kúnine orai óteýsiz negizde berildi, dep habarlaidy Dalanews.kz.
Qonys ieleri tolyq jihazdalǵan páterlerdiń jaily ómir súrýge múmkindik berip, ǵylymi jáne kásibi qyzmetke shoǵyrlanýǵa jaǵdai jasaitynyn atap ótti. Qonystaný barysynda olar kórsetilgen qoldaý úshin shynaiy alǵystaryn bildirdi.
Baspana alǵandardyń qatarynda elimizdiń jetekshi ǵylymi uiymdarynyń ókilderi bar. Solardyń biri – 13 jyldyq ǵylymi tájiribesi bar Shyryn Muratqyzy. Ol Scopus jáne Web of Science bazalarynda indeksteletin basylymdardy qosa alǵanda 9 ǵylymi maqalanyń avtory, oqý quralynyń teń avtory jáne avtorlyq quqyq iesi.
Sondai-aq qonys ieleriniń qatarynda 15 jyldyq ǵylymi tájiribesi bar Arman Ómirzaqov bar. Ol halyqaralyq retsenziialanatyn jýrnaldarda jariialanǵan 20-dan astam ǵylymi eńbektiń avtory, sondai-aq Qazaqstan Respýblikasynyń 8 patentiniń teń avtory. Onyń zertteýleri energetika salasyndaǵy bolashaǵy zor baǵyttardy, sonyń ishinde otyn elementteri, mikrobatareialar jáne fotokatalitikalyq materialdardy qamtidy.
Mádina Qumarǵazina Scopus halyqaralyq bazasynda jariialanǵan ǵylymi eńbekterdiń avtory, sondai-aq Qazaqstan Respýblikasynyń 10-nan astam patentiniń jáne bir Eýraziialyq patenttiń teń avtory. Onyń zertteýleri energiia tiimdi tehnologiialardy damytýǵa jáne jańartylatyn energiia kózderin paidalanýǵa baǵyttalǵan.
Jas ǵalymdardy qoldaý – elimizdiń ǵylymi áleýetin damytýǵa baǵyttalǵan memlekettik saiasattyń mańyzdy baǵyty bolyp qala beredi.
