Almatynyń ortalyǵynda gastronomiialyq kóshe paida bolýy múmkin. Ýrbanisterdiń pikirinshe, mundai joba qalaǵa jańa týristerdi tartyp, jergilikti turǵyndar úshin taǵy bir tartymdy orynǵa ainalýy yqtimal. Joba jýyrda qala ákimine tanystyrylǵan, dep habarlaidy Dalanews.kz KTK telearnasyna silteme jasap.
Soǵan sáikes, jaqyn ýaqytta Qurmanǵazy kóshesiniń Abylai han dańǵyly men Dostyq dańǵyly aralyǵyndaǵy bóligi birtutas meiramhanalar serýen jolyna ainalýy múmkin. Munda jaiaý júrginshilerge arnalǵan keńistik kóbeiip, jazǵy terrasalar paida bolady, ǵimarattardyń qasbetteri rettelip, ortaq dizain-kod engiziledi. Alaida qala turǵyndarynyń pikirleri ekige bólingen: bireýler ortalyqta onsyz da qoǵamdyq tamaqtaný oryndary tym kóp dese, endi biri bul bastamany qoldaidy.
Qazirdiń ózinde Qurmanǵazy kóshesin Almatydaǵy eń «dámdi» kóshelerdiń biri deýge bolady. Munda shaǵyn kofehanalardan bastap ártúrli as mázirin usynatyn meiramhanalarǵa deiin kóptep ornalasqan. Iaǵni bul jerde gastro-klaster qalyptasyp qoiǵan. Endi ony bir júiege keltirip, qalanyń tolyqqandy tartymdy núktesine ainaldyrý kózdelip otyr.
Restoratorlar bul bastamany qoldap otyr.
Raýgash Qasymova, kofehananyń jetekshisi:
"Bizge ákimdikten Qurmanǵazy kóshesinde gastronomiialyq kóshe ashý josparlanyp otyrǵany týraly habarlama keldi. Biz bul bastamany tolyq qoldaimyz. Bul jańa týristerdi tartyp, biznestiń damýyna serpin beredi dep oilaimyn. Meiramhanalar jelisi damyp, jaqsy básekelestik paida bolady. Nátijesinde qonaqtar sany da artady".
Al almatylyqtardyń pikiri ártúrli. Keibireýler qala ortalyǵy onsyz da meiramhana men dámhanalarǵa tolyp ketkenin aitady. Basqalary mundai gastronomiialyq kóshelerdi qalanyń basqa aýdandarynda damytý durys bolar edi degen pikirde.
Sonymen qatar bul ideiany qoldaǵanymen, ekologiiaǵa, jasyl aimaqtarǵa jáne tarihi kelbetke alańdaityndar da bar.
– Menińshe, ákimdik qalanyń basqa bólikterin damytýǵa kóbirek kóńil bólse durys bolar edi.
– Meniń oiymsha, bul tamasha bastama. Árine, qalada kafe men meiramhana onsyz da kóp, biraq olardyń belgili bir jerde shoǵyrlanǵany da jaqsy.
– Bul óte jaqsy bastama dep oilaimyn. Tek ekojúie – aǵashtar men saiabaqtar – zardap shekpese eken.
– Bul strategiialyq mańyzy bar aimaq. Ony jańartý kerek, biraq munda talǵamsyz meiramhanalardyń salynyp ketýine jol bermeý qajet.
Sarapshylardyń aitýynsha, mundai jobalar qalaǵa birden birneshe paida ákelýi múmkin: týrizmniń damýyna yqpal etedi jáne qalalyq infraqurylymdy jaqsartady. Sonymen qatar gastronomiialyq keńistikter durys uiymdastyrylsa, kólik júktemesin de azaitýy yqtimal. Iaǵni adamdar keshki ýaqytty meiramhanada ótkizý úshin qalanyń bir shetinen ekinshi shetine barmaidy.
Vladislav Filatov, arhitektor-ýrbanist:
"Eger qalada barlyq meiramhanany bir jerge jinasańyz, onda adamdar sol jaqqa kólikpen aǵylyp, keptelis kóbeiip, aýa lastanady. Al «qalada meiramhana kóp» dep olardy bir jerge toptastyrsańyz, ol oryn eń kóp júkteletin aimaqqa ainalady. Meniń oiymsha, bul kóshe birtindep týristik ári meiramhanalar shoǵyrlanǵan orynǵa ainalyp, tek jergilikti turǵyndarǵa emes, syrttan keletin qonaqtarǵa da tartymdy bolady".
Almaty ákimdiginde gastronomiialyq kóshe qalanyń ortasyn damytý jáne týristik tartymdylyǵyn arttyrýǵa baǵyttalǵan keń aýqymdy strategiianyń bir bóligi ekenin aitady. Qurmanǵazy kóshesi jaiaý serýendeýge qolaily keńistikke ainalýy tiis – munda jaiaý júrginshiler aimaǵy keńeitilip, ǵimarattardyń qasbetteri bir stilde retteledi.
Erlan Omarov, Almaty qalasy kásipkerlik jáne investitsiialar basqarmasy basshysynyń orynbasary:
"Biz bul jumysty restoratorlarmen birge júrgizýdi josparlap otyrmyz. Olardy da osy iske tartyp, kósheni birge damytqymyz keledi. Negizgi maqsat – týristerdi tartý. Bul – Qazaqstannyń óz ishindegi týrister de, shetelden keletin qonaqtar da. Qazir Shymbulaq, Medeý siiaqty oryndar týrister arasynda tanymal. Qurmanǵazy kóshesi de olardyń týristik baǵytyna enýi múmkin".
Jobanyń naqty qashan júzege asa bastaityny ázirge belgisiz. Sondai-aq bul kóshe almatylyqtardyń keshki serýenderiniń jańa simvolyna ainala ma, álde jai ǵana taǵy bir meiramhanalar kvartaly bolyp qala ma – ony ýaqyt kórsetedi.
