Алматының орталығында гастрономиялық көше пайда болуы мүмкін. Урбанистердің пікірінше, мұндай жоба қалаға жаңа туристерді тартып, жергілікті тұрғындар үшін тағы бір тартымды орынға айналуы ықтимал. Жоба жуырда қала әкіміне таныстырылған, деп хабарлайды Dalanews.kz КТК телеарнасына сілтеме жасап.
Соған сәйкес, жақын уақытта Құрманғазы көшесінің Абылай хан даңғылы мен Достық даңғылы аралығындағы бөлігі біртұтас мейрамханалар серуен жолына айналуы мүмкін. Мұнда жаяу жүргіншілерге арналған кеңістік көбейіп, жазғы террасалар пайда болады, ғимараттардың қасбеттері реттеліп, ортақ дизайн-код енгізіледі. Алайда қала тұрғындарының пікірлері екіге бөлінген: біреулер орталықта онсыз да қоғамдық тамақтану орындары тым көп десе, енді бірі бұл бастаманы қолдайды.
Қазірдің өзінде Құрманғазы көшесін Алматыдағы ең «дәмді» көшелердің бірі деуге болады. Мұнда шағын кофеханалардан бастап әртүрлі ас мәзірін ұсынатын мейрамханаларға дейін көптеп орналасқан. Яғни бұл жерде гастро-кластер қалыптасып қойған. Енді оны бір жүйеге келтіріп, қаланың толыққанды тартымды нүктесіне айналдыру көзделіп отыр.
Рестораторлар бұл бастаманы қолдап отыр.
Раугаш Қасымова, кофехананың жетекшісі:
"Бізге әкімдіктен Құрманғазы көшесінде гастрономиялық көше ашу жоспарланып отырғаны туралы хабарлама келді. Біз бұл бастаманы толық қолдаймыз. Бұл жаңа туристерді тартып, бизнестің дамуына серпін береді деп ойлаймын. Мейрамханалар желісі дамып, жақсы бәсекелестік пайда болады. Нәтижесінде қонақтар саны да артады".
Ал алматылықтардың пікірі әртүрлі. Кейбіреулер қала орталығы онсыз да мейрамхана мен дәмханаларға толып кеткенін айтады. Басқалары мұндай гастрономиялық көшелерді қаланың басқа аудандарында дамыту дұрыс болар еді деген пікірде.
Сонымен қатар бұл идеяны қолдағанымен, экологияға, жасыл аймақтарға және тарихи келбетке алаңдайтындар да бар.
– Меніңше, әкімдік қаланың басқа бөліктерін дамытуға көбірек көңіл бөлсе дұрыс болар еді.
– Менің ойымша, бұл тамаша бастама. Әрине, қалада кафе мен мейрамхана онсыз да көп, бірақ олардың белгілі бір жерде шоғырланғаны да жақсы.
– Бұл өте жақсы бастама деп ойлаймын. Тек экожүйе – ағаштар мен саябақтар – зардап шекпесе екен.
– Бұл стратегиялық маңызы бар аймақ. Оны жаңарту керек, бірақ мұнда талғамсыз мейрамханалардың салынып кетуіне жол бермеу қажет.
Сарапшылардың айтуынша, мұндай жобалар қалаға бірден бірнеше пайда әкелуі мүмкін: туризмнің дамуына ықпал етеді және қалалық инфрақұрылымды жақсартады. Сонымен қатар гастрономиялық кеңістіктер дұрыс ұйымдастырылса, көлік жүктемесін де азайтуы ықтимал. Яғни адамдар кешкі уақытты мейрамханада өткізу үшін қаланың бір шетінен екінші шетіне бармайды.
Владислав Филатов, архитектор-урбанист:
"Егер қалада барлық мейрамхананы бір жерге жинасаңыз, онда адамдар сол жаққа көлікпен ағылып, кептеліс көбейіп, ауа ластанады. Ал «қалада мейрамхана көп» деп оларды бір жерге топтастырсаңыз, ол орын ең көп жүктелетін аймаққа айналады. Менің ойымша, бұл көше біртіндеп туристік әрі мейрамханалар шоғырланған орынға айналып, тек жергілікті тұрғындарға емес, сырттан келетін қонақтарға да тартымды болады".
Алматы әкімдігінде гастрономиялық көше қаланың ортасын дамыту және туристік тартымдылығын арттыруға бағытталған кең ауқымды стратегияның бір бөлігі екенін айтады. Құрманғазы көшесі жаяу серуендеуге қолайлы кеңістікке айналуы тиіс – мұнда жаяу жүргіншілер аймағы кеңейтіліп, ғимараттардың қасбеттері бір стильде реттеледі.
Ерлан Омаров, Алматы қаласы кәсіпкерлік және инвестициялар басқармасы басшысының орынбасары:
"Біз бұл жұмысты рестораторлармен бірге жүргізуді жоспарлап отырмыз. Оларды да осы іске тартып, көшені бірге дамытқымыз келеді. Негізгі мақсат – туристерді тарту. Бұл – Қазақстанның өз ішіндегі туристер де, шетелден келетін қонақтар да. Қазір Шымбұлақ, Медеу сияқты орындар туристер арасында танымал. Құрманғазы көшесі де олардың туристік бағытына енуі мүмкін".
Жобаның нақты қашан жүзеге аса бастайтыны әзірге белгісіз. Сондай-ақ бұл көше алматылықтардың кешкі серуендерінің жаңа символына айнала ма, әлде жай ғана тағы бір мейрамханалар кварталы болып қала ма – оны уақыт көрсетеді.
