– Medısınalyq uıymdy tańdaý quqyǵyn megapolıstiń 10 myńnan astam turǵyny paıdalandy, olardyń barlyǵy elektrondyq úkimet portaly arqyly ótinim berdi egov.kz, – dedi Tileýhan Ábildaev.
ÁMSQ-da atap ótkendeı, bıyl Almaty qalasynda tirkeý naýqanyna qatysqan adamdardyń sany ótken jylmen salystyrǵanda birshama ósti.
Tileýhan Ábildaevtyń aıtýynsha, tirkeý naýqanyna alǵashqy medısınalyq-sanıtarlyq kómek kórsetetin 79 medısınalyq uıym qatysty, olardyń 40-y – jeke menshik uıymdar. Olardyń 5-i ózderiniń resýrstyq múmkindikteri men quzyretterin tıisti qujattarmen rastap, alǵash ret qatysty.
– Bul fakt qýantady, óıtkeni ol memlekettik uıymdardyń júktemesin jeńildetýge kómektesedi. Óz kezeginde, halyqtyń keń tańdaý múmkindigi paıda bolady, – dedi spıker.
Sonymen qatar, emhanalar sanynyń artýy jalpy praktıka dárigerleriniń kezekteri men júktemesin azaıtýǵa múmkindik beredi. Osy maqsatqa jetý úshin jańa ýchaskelerdi ashý boıynsha sharalar qabyldanýda.
Baspasóz konferensıasyna Almaty qalasy Qoǵamdyq densaýlyq basqarmasy basshysynyń orynbasary Laýra Myrzaǵalı qatysty.
– Medısınalyq kómek kórsetetin birinshi býyn retinde jalpy praktıka dárigerleriniń júktemesin eskere otyryp, 2021 jylǵy 1 qańtar men 1 shilde aralyǵynda Almatyda MSAK uıymdarynda jalpy praktıka dárigerleriniń 15 qosymsha ýchaskesi ashyldy. Qala boıynsha barlyǵy 989 ýchaske uıymdastyrylǵan, – dep atap ótti Laýra Myrzaǵalı.
Onyń aıtýynsha, vedomstvoǵa qarasty medısınalyq uıymdarda dárigerlerdiń tapshylyǵy kelesi mamandyqtar boıynsha seziledi: anestezıolog – reanımatologtar, jalpy praktıka dárigerleri, pedıatrlar, ýchaskelik terapevtter, eresekter men balalardyń nevropatologtary, akýsher-gınekologtar jáne t. b.
Búginde Almatyda medısınalyq joǵary oqý oryndary túlekteriniń sany 723 mamandy quraıdy, onyń ishinde 359 ıntern. Onyń 373-i jumysqa ornalastyryldy.
Barlyq mamandyqtar boıynsha medısınalyq kolejderdiń 3800-ge jýyq stýdenti oqýyn aıaqtady, olardyń 264-i grant boıynsha, olardy jumysqa ornalastyrý jalǵasýda. Osy máseleni sheshý úshin qosymsha 2021-2025 jyldarǵa arnalǵan kadr tapshylyǵyn joıý jónindegi jol kartasy bekitildi.
Respýblıkalyq elektrondyq densaýlyq saqtaý ortalyǵynyń málimetterine sáıkes, respýblıka boıynsha alǵashqy medısınalyq-sanıtarlyq kómek uıymdaryna 19,4 mln-nan astam adam tirkelgen, Almaty boıynsha tirkelgen halyq sany 2,1 mln-nan astam adamdy quraıdy, onyń ishinde sheteldikter men qandastar da bar.
Tirkeý naýqany – emhanany aýystyrýdyń jalǵyz múmkindigi emes. Qazaqstandyqtar jyl ishinde bir ret erkin tańdaý quqyǵy boıynsha, sondaı-aq emhananyń kóshýi, qaıta uıymdastyrylýy, onyń ÁMSQ-men sharty aıaqtalýy kezinde nemese kerisinshe, turǵylyqty jeriniń janynda ÁMSQ-men sharty bar jańa emhana paıda bolǵan kezde, azamat erikti medısınalyq saqtandyrý shartyn jasasqan jaǵdaıda emhananyń qyzmetteri óteletin bolady.
