Taiaýda Almaty qalasynyń Bostandyq aýdanynyń komiýniti ortalyǵynda elimizdiń barlyq aimaqtarynan kelgen Jastar saiasaty basqarma basshylarynyń sleti ótti, – dep habarlaidy Dalanews.kz.
Is-sharaǵa Almaty qalasy ákiminiń orynbasary Arman Qyryqbaev, QR Mádeniet jáne aqparat ministrliginiń Jastar jáne otbasy isteri komitetiniń tóraǵasy Qairat Qambarov, Respýblika boiynsha Jastar saiasaty basqarma basshylary, Jastar resýrstyq ortalyqtarynyń jetekshileri, qalamyzdyń belsendi jastary, úkimettik emes uiymdardyń tóraǵalary, Jastar keńesiniń músheleri qatysty.
Kezdesý barysynda Arman Orazbaiuly qala ákimdiginiń jastarǵa arnalǵan áleýmettik infraqurylym qurýdaǵy jumystary týraly toqtalyp, atap ótti.
– Almaty turǵyndarynyń shamamen úshten biri nemese 682 myńy 14 pen 35 jas aralyǵyndaǵy jastar. Bul óz kezeginde bizden jastardy qalamyzdyń damýy úshin atqarylyp jatqan jumystarǵa belsendi tartýdy, olardyń jaily ómir súrýi, jumys isteýi, bos ýaqytyn tiimdi ótkizýi úshin qolaily jaǵdailar jasaýdy talap etedi. Osy oraida biz qalamyzdyń barlyq aýdanynda NEET jastardy qoldaý úshin 8 komiýniti ortalyq ashtyq, – dedi qala ákiminiń orynbasary Arman Qyryqbaev.
Aimaqtardan kelgen qonaqtarǵa komiýniti ortalyqtardyń jumysymen Almaty qalasynyń Jastar saiasaty basqarmasynyń basshysy Qaiyrjan Mendiǵaliev tanystyrdy.
– Árbir komiýniti ortalyq kreativti qoǵamdyq keńistikti quraidy. Munda jastardy qoldaý úshin qajettiniń bári bir jerde jinaqtalǵan: bul ártúrli memlekettik baǵdarlamalar boiynsha keńes berý, psihologiialyq jáne zańgerlik kómek, NEET jastaryn qysqa merzimdi kýrstar arqyly ózekti mamandyqtarǵa oqytý jáne jumysqa ornalastyrý, – dep atap ótti Qaiyrjan Mendiǵaliev.
Aita keteiik, Almaty qalasyn damytý baǵdarlamasy aiasynda 2025 jylǵa deiin ár aýdanda ekiden jalpy 16 jastar komiýniti ortalyǵyn iske qosý josparlanǵan, olardyń 8-i jumysyn bastady.
Is-sharaǵa qatysqan QR Mádeniet jáne aqparat ministrliginiń Jastar jáne otbasy isteri komitetiniń tóraǵasy Qairat Qambarov barlyq aýdandardaǵy komiýniti ortalyqtarda bolyp, Almaty qalasynyń jastar saiasatanyń jumysyna joǵary baǵasyn berdi.
– Jastarǵa qoldaý kórsetetin, qajettiniń barlyǵy bir jerde jinaqtaǵan komiýniti ortalyqtardy kórip qýanyp otyrmyn. Munda jastardy qoldaý úshin barlyq jaǵdai jasalyp, eń bastysy barlyq qyzmet túrin tegin alýǵa bolatyny, meni qýantty. Meniń oiymsha bundai formattaǵy ortalyqtar tek Almatyda ǵana emes, elimizdiń barlyq qalalarynda bolý qajet, – dedi óz sózinde komitet tóraǵasy Qairat Qambarov.
Aita keteiik, Jastar saiasatynyń basty maqsaty – árbir jas almatylyqqa qoǵamda óz áleýetin iske asyrýǵa jáne qoǵamnyń tolyqqandy múshesi bolýǵa kómektesý. Al komiýniti ortalyqtar jastardy áleýmettendirýdiń mańyzdy quraly bolýǵa baǵyttalǵan.
