Almatyda EdCrunch Glocal bilim berýdegi jańa tehnologiialar boiynsha konferentsiia ótti
Konferentsiia baǵdarlamasy balalardyń erte damýy; XXI ǵasyr mektebi jáne daǵdylary; tsifrlyq ýniversitet, korporativtik oqytý, EdCrunch Stage, EdTech naryq jáne investitsiialar; EdCrunch Night – edutainment event (bilim berý shoýy) siiaqty trekterden turady. Negizgi taqyryby – «Jańa bilim berý tájiribesin jobalaý» (Learning experience design).
Konferentsiia qatysýshylaryna arnaǵan sózinde megapolis ákimi B. Saǵyntaev ýaqyt syn-tegeýrinderine durys jaýap izdeý jáne jańa bilim berý tájiribesin qalyptastyrý strategiialyq mańyzy bar máseleler bolyp tabylatynyn atap ótti.
– Kún tártibinde – bilim berý sapasyn damytý jáne onyń naryq pen qoǵamnyń úmitine sáikestigi máseleleri. Osy mindetterdi sheshý maqsatynda biz «Almaty 2050» jańa strategiiasyn iske asyramyz, ol barshaǵa ashyq, qazaqstandyq talanttyń, týrizm men innovatsiianyń ósip kele jatqan orny úshin adamortalyq qala qurýǵa baǵyttalǵan, – dep atap ótti B. Saǵyntaev.
Almaty ákimi órshil josparlardyń basty sharty adami kapitaldy damytý ekenin atap ótti.
– Bul kreativti taptyń ózegin quraityn aqyl-oiy bar adamdar. Ótken jyldan bastap qalada bilim berý júiesin álemdik deńgeige deiin odan ári damytýǵa baǵyttalǵan damý baǵdarlamalary iske qosylǵanyn atap ótken jón, – dedi B. Saǵyntaev.
Konferentsiia jumysyna 25 elden 400-den astam spiker qatysty. Eki kún ishinde 150 sóz sóileý, saraptamalyq sessiia, paneldik pikirtalas jáne sheberlik sabaqtary ótedi. Qatysýshylar pedagogikalyq dizain salasyndaǵy ozyq tájiribelerimen bólisip, bilim berý salasynyń bolashaǵy jáne jańa tehnologiialardyń, oqytý salasyndaǵy ǵylym jetistikteriniń áseri máselelerin talqylaidy.
Spikerler arasynda – Skolkovo basqarý mektebiniń praktika professory Pavel Lýksha, Fincraft Group holdinginiń prezidenti Keńes Raqyshev, rejisser-stsenarist, tehnologiialyq kásipker, Bazelevs kinokompaniiasynyń negizin qalaýshy Timýr Bekmambetov, LX Design pioneri, «Bilim berý tájiribesin jobalaý» termininiń avtory, LXD Canvas konferentsiiasynyń baǵdarlamalyq direktory Nils Flor, Tan Media Group iesi Armanjan Baitasov, «Sábi» qaiyrymdylyq qorynyń prezidenti Ásel Tasmaǵambetova, «Iandeks» bilim berý jobalarynyń prodiýseri Anastasiia Chýkovskaia, UWC Dilijan College Direktorlar keńesiniń tóraǵasy Veronika Zonabend, Lancaster Group aktsioneri jáne direktorlar keńesiniń tóraǵasy Berik Qaniev, «Altyn Qyran Foundation» QQ qamqorshylyq keńesiniń tóraǵasy Islambek Saljanov, Aitas.kz holdingisiniń basshysy Serik Tolyqpaev jáne taǵy basqalar boldy. Konferentsiianyń basynda qupiia qonaq klassikalyq mýzykany dáripteýshi, keńes jáne shved dáriskeri-mýzykatanýshy Mihail Kazinik boldy.
