Almatyda bir keshtiń ózinde ailyq jaýyn normasynyń jartysynan astamy jaýdy, dep habarlaidy Dalanews.kz.
16 qyrkúiek kúni keshke Almatyda qatty jańbyr jaýdy. Jaýyn-shashyn saǵat 16:00 shamasynda bastalyp, mólsheri 15 mm-ge jetti. Bul ailyq normanyń jartysynan kóbi.
Almaty ákimdiginiń habarlaýynsha, qalanyń joǵarǵy bóliginde aryqtardyń tolyp ketýinen joldardyń kei ýchaskeleri sý astynda qalǵan. Aýa raiynyń saldaryn joiýǵa 400-den astam jumysshy, 96 arnaiy tehnika, 40 motopompa, 19 assenizator kóligi jáne 71 mobildi brigada jumyldyryldy. Sondai-aq tótenshe jaǵdailar departamenti men «Qalalyq qutqarý qyzmeti» bólimsheleri de jumysqa tartyldy.
«Qazgidromet» boljamy
17 qyrkúiekte aýa raiy jaýyn-shashynsyz, aýa temperatýrasy +18…+20 °C
18–19 qyrkúiekte kei jerlerde jańbyr men naizaǵai, túnde tuman, kúndiz +16…+18 °C
Eske salaiyq, buǵan deiin Almatyda qatty jańbyrdan jol opyrylyp, kólikter búlingenin habarlaǵan edik.
Oqiǵa Áýezov aýdanyndaǵy Amanjol kóshesinde bolǵan.
