Almatyda balalar sportyna baǵyttalǵan jańa bastama paida boldy. Kásipker Kairat Reimov pen onyń seriktesteri “Tarlan” atty balalar fýtbol klýbyn iske qosty. Joba tek kommertsiialyq emes, eń aldymen áleýmettik missiiaǵa baǵyttalýymen erekshelenedi, dep habarlaidy Dalanews.kz
Búginde Almatyda fýtbol úiirmeleri az emes. Baǵasy ártúrli, memlekettik baǵdarlamalarǵa kiretinderi de, jeke jumys isteitinderi de bar. Alaida olardyń bárinde birdei júie men sapa saqtala bermeidi. Keibir klýbtarda jattyqtyrýshylar jii aýysady, alań men zal jetispeidi, tipti keibiri jabylyp qalyp, ata-analar tólemi kúiip ketetin jaǵdailar da kezdesedi.
Odan bólek, balalardy jas ereksheligine qaramai bir topqa jinap, júiesiz jattyǵý júrgizý de jii baiqalady. Mundai tásil balalardyń motivatsiiasyna da, oiyn deńgeiine de keri áser etedi. Nátijesinde balalar fýtboly kóbine damý alańynan góri tabys kózine ainalyp ketkendei áser qaldyrady.
Osyndai jaǵdaida “Tarlan” klýbynyń ashylýy – mańyzdy qadam. Jobanyń negizin qalaýshy Kairat Reimovtyń aitýynsha, klýbqa balalar ártúrli áleýmettik ortadan qabyldanady, onyń ishinde áleýmettik jaǵdaiy tómen otbasylardan shyqqan balalarǵa erekshe kóńil bólinedi.
«Komandaǵa balalardy jan-jaqtan jinadyq. Tolyq ekipirovka, týrnirlarǵa qatysý, qarjylandyrý, zamanaýi alań – barlyǵyn qamtamasyz etip jatyrmyz. Bizdiń maqsat – daiyn komandany satyp alý emes, balalardy kishkentaiynan tárbielep, bolashaq chempiondardy shyǵarý», – deidi ol.
Klýb qurylymy da júieli túrde jasalǵan. “Tarlan” komandasynyń jetekshisi Nursultannyń aitýynsha, úsh quram qarastyrylǵan:
-
S quramy – jańadan bastaýshylar;
-
V quramy – tájiribesi bar, orta deńgeidegi oiynshylar;
-
A quramy – úzdik fýtbolshylar.
Balalar tolyqtai demeýshilik negizde jattyǵady: olar forma, jattyǵý alańy jáne týrnirlermen qamtamasyz etiledi, ai saiynǵy tólem jasamaidy. Sonymen qatar, balalarmen tájiribeli jattyqtyrýshylar jumys isteidi.
Joba avtorlarynyń aitýynsha, basty maqsat – tek kásibi fýtbolshylardy tárbieleý emes. Eń mańyzdysy – deni saý, tártipti ári maqsatshyl urpaq qalyptastyrý.
“Balalar mindetti túrde kásibi sportshy bolýy shart emes. Biraq sport arqyly durys baǵyt alsa – bul da úlken jeńis”, – deidi joba uiymdastyrýshylary.
Aldaǵy ýaqytta “Tarlan” klýbyn úlken akademiiaǵa ainaldyrý josparlanyp otyr. Bul bastama elimizdegi balalar fýtbolyndaǵy júiesizdik máselesin azaityp, sapaly daiyndyqqa jol ashýy múmkin.
