Atyraýdaǵy sotta Sársemalievtiń kórshisimen jazysqan hattary kórsetildi. Tergeý nusqasyna sáikes, ol hattardy Naýryzdyń atynan jazǵan, dep habarlaidy dalanews.kz.
Sot barysynda belgili bolǵandai, kórshi Sherhan Eńsegenuly Naýryz Muqanǵalievpen dostyq qarym-qatynasta bolyp, onymen únemi bailanysyp turǵan. Ádette olar bir-birine daýystyq habarlama jiberip otyrǵan. Alaida 2025 jyldyń 5 qarashasynan bastap kórshige Naýryzdyń atynan mátindik habarlamalar kele bastaǵan. Tergeý nusqasy boiynsha, bul habarlamalardyń bárin Naýryz óltirilgennen keiin onyń atynan Sultan Sársemaliev jibergen.
Sársemalievtiń alǵashqy ótinishi malǵa qatysty bolǵan. Hat jazǵan adam keshke maldy aýlaǵa kirgizip qoiýdy surap, úide eshkim joq ekenin aitqan. Kórshisi kelisip, ýaqytyn naqtylaǵan. Oǵan «saǵat 6-da» dep jaýap bergen. Keiin keshkisin ol ótinishtiń oryndalǵanyn surap, oń jaýap alǵan.
Kelesi kúni ótinish qaita jalǵasqan. Bul joly «Naýryz» tańerteń qoi men siyrdy óriske shyǵaryp jiberýdi surap, aqysyna Kaspi arqyly aqsha aýdaratynyn aitqan. Alaida kórshisi aqshadan bas tartyp, bári durys pa, ata-anasy qashan oralatynyn suraǵan. Jaýap retinde ata-anasynyń qalada em qabyldap jatqanyn, qashan keleri belgisiz ekenin jazǵan. Kórshisi malǵa sý berý kerek pe dep suraǵanda, áke-sheshesi kelgen soń ózderi ainalysatynyn aityp, qajet emes dep jaýap bergen.
Keiin de hat almasý osy baǵytta jalǵasqan. Habarlama jazǵan adam ata-anasynyń áli kele almai jatqanyn aityp, kórshisinen sharýashylyqqa qarap turýyn suraǵan. Sonymen qatar qaita-qaita ótinish aityp jatqanyn túsinip, renjimeýin ótingen. Ol ákesiniń buǵan deiin malǵa qaraýdy basqa adamǵa tapsyrǵanyn, biraq ol adamnyń ishimdikke salynyp, malǵa qaramai ketkenin aityp, sol sebepti kórshisinen kómek suraýǵa májbúr bolǵanyn jazǵan.
Sherhan Eńsegenuly birneshe kún boiy malǵa qarap júrgen. Keiin Darhan Baqytov esimdi malshy tabylǵan. Ol Naýryzdyń burynnan tanysy bolǵan. Sot barysynda belgili bolǵandai, Sársemaliev Naýryzdyń atynan eki jyldan keiin dál osy adammen bailanysqa shyqqan.
Bul oqiǵada bir kúmán bar ekenin alǵash bolyp kórshi Sherhan sezgen. Ol mal satyla bastaǵan kezde kúdiktene bastaǵan. Daýystyq habarlamalarynda «Bir nársege urynyp qaldyń ba?», «Máken qaida?», «Sende bir másele bar siiaqty», «Aitsań, kómektesemin ǵoi, biz kórshi emespiz be?» dep qatań suraǵan.
Buǵan jaýap retinde Sársemaliev Naýryzdyń atynan adamdardyń mazaq etkenin qalamaitynyn, qarjylyq qiyndyqtarǵa bailanysty máseleleri bar ekenin jazǵan. Sondai-aq qazirgi ýaqytta sharýashylyqpen ózi ainalysa almai júrgenin, qaryzy kóbeiip ketkenin, al anasynyń ýaiymnan qan qysymy kóterilip, tósek tartyp qalǵanyn aitqan. Budan bólek, úilengeli júrgenin, sondyqtan ákesi oǵan mal satýǵa ruqsat bergenin habarlaǵan.
