الماتىدا بالالار سپورتىنا باعىتتالعان جاڭا باستاما پايدا بولدى. كاسىپكەر كايرات رەيموۆ پەن ونىڭ سەرىكتەستەرى “Tarlan” اتتى بالالار فۋتبول كلۋبىن ىسكە قوستى. جوبا تەك كوممەرسيالىق ەمەس، ەڭ الدىمەن الەۋمەتتىك ميسسياعا باعىتتالۋىمەن ەرەكشەلەنەدى، دەپ حابارلايدى Dalanews.kz

بۇگىندە الماتىدا فۋتبول ۇيىرمەلەرى از ەمەس. باعاسى ءارتۇرلى، مەملەكەتتىك باعدارلامالارعا كىرەتىندەرى دە، جەكە جۇمىس ىستەيتىندەرى دە بار. الايدا ولاردىڭ بارىندە بىردەي جۇيە مەن ساپا ساقتالا بەرمەيدى. كەيبىر كلۋبتاردا جاتتىقتىرۋشىلار ءجيى اۋىسادى، الاڭ مەن زال جەتىسپەيدى، ءتىپتى كەيبىرى جابىلىپ قالىپ، اتا-انالار تولەمى كۇيىپ كەتەتىن جاعدايلار دا كەزدەسەدى.

ودان بولەك، بالالاردى جاس ەرەكشەلىگىنە قاراماي ءبىر توپقا جيناپ، جۇيەسىز جاتتىعۋ جۇرگىزۋ دە ءجيى بايقالادى. مۇنداي ءتاسىل بالالاردىڭ موتيۆاسياسىنا دا، ويىن دەڭگەيىنە دە كەرى اسەر ەتەدى. ناتيجەسىندە بالالار فۋتبولى كوبىنە دامۋ الاڭىنان گورى تابىس كوزىنە اينالىپ كەتكەندەي اسەر قالدىرادى.

وسىنداي جاعدايدا “Tarlan” كلۋبىنىڭ اشىلۋى – ماڭىزدى قادام. جوبانىڭ نەگىزىن قالاۋشى كايرات رەيموۆتىڭ ايتۋىنشا، كلۋبقا بالالار ءارتۇرلى الەۋمەتتىك ورتادان قابىلدانادى، ونىڭ ىشىندە الەۋمەتتىك جاعدايى تومەن وتباسىلاردان شىققان بالالارعا ەرەكشە كوڭىل بولىنەدى.

«كومانداعا بالالاردى جان-جاقتان جينادىق. تولىق ەكيپيروۆكا، تۋرنيرلارعا قاتىسۋ، قارجىلاندىرۋ، زاماناۋي الاڭ – بارلىعىن قامتاماسىز ەتىپ جاتىرمىز. ءبىزدىڭ ماقسات – دايىن كوماندانى ساتىپ الۋ ەمەس، بالالاردى كىشكەنتايىنان تاربيەلەپ، بولاشاق چەمپيونداردى شىعارۋ»، – دەيدى ول.

كلۋب قۇرىلىمى دا جۇيەلى تۇردە جاسالعان. “Tarlan” كومانداسىنىڭ جەتەكشىسى نۇرسۇلتاننىڭ ايتۋىنشا، ءۇش قۇرام قاراستىرىلعان:

• س قۇرامى – جاڭادان باستاۋشىلار؛

• ۆ قۇرامى – تاجىريبەسى بار، ورتا دەڭگەيدەگى ويىنشىلار؛

• ا قۇرامى – ۇزدىك فۋتبولشىلار.

بالالار تولىقتاي دەمەۋشىلىك نەگىزدە جاتتىعادى: ولار فورما، جاتتىعۋ الاڭى جانە تۋرنيرلەرمەن قامتاماسىز ەتىلەدى، اي سايىنعى تولەم جاسامايدى. سونىمەن قاتار، بالالارمەن تاجىريبەلى جاتتىقتىرۋشىلار جۇمىس ىستەيدى.

جوبا اۆتورلارىنىڭ ايتۋىنشا، باستى ماقسات – تەك كاسىبي فۋتبولشىلاردى تاربيەلەۋ ەمەس. ەڭ ماڭىزدىسى – دەنى ساۋ، ءتارتىپتى ءارى ماقساتشىل ۇرپاق قالىپتاستىرۋ.

“بالالار مىندەتتى تۇردە كاسىبي سپورتشى بولۋى شارت ەمەس. ءبىراق سپورت ارقىلى دۇرىس باعىت السا – بۇل دا ۇلكەن جەڭىس”، – دەيدى جوبا ۇيىمداستىرۋشىلارى.

الداعى ۋاقىتتا “Tarlan” كلۋبىن ۇلكەن اكادەمياعا اينالدىرۋ جوسپارلانىپ وتىر. بۇل باستاما ەلىمىزدەگى بالالار فۋتبولىنداعى جۇيەسىزدىك ماسەلەسىن ازايتىپ، ساپالى دايىندىققا جول اشۋى مۇمكىن.