Búgin, 19 maýsym kúni Almaty qalasynda Qazaqstannyń úzdik mektep komandalary arasynda shahmat týrnıri bastaldy. Bul týrnırdiń jeńimpazdary 2025 jyly ótetin mektep komandalary arasyndaǵy álem chempıonatyna FIDE World Schools Team Championship 2025) qatysý múmkindigine ıe bolady. Eń myqty alty komanda Aleksandrıa qalasynda (AQSH, Vırdjınıa shtaty) 2025 jylǵy 2-7 tamyz aralyǵynda ótetin álemdik birinshilikke joldama alady. Jarys Respýblıkalyq fızıka-matematıka mektebinde (Buhar Jyraý dańǵyly, 36) ótip jatyr jáne 20 maýsymǵa deıin jalǵasady. Bul jóninde Qazaqstan shahmat federasıasynyń baspasóz qyzmeti málimdedi,- dep habarlaıdy Dalanews.kz
12 jasqa deıin (U12) jáne 18 jasqa deıingi (U18) sanattarda sáıkesinshe 21 jáne 20 komanda baq synaýda. Ár komanda quramynda – bir mektepten shyqqan úsh ul jáne bir qyz bar (2024-2025 oqý jyly úshin). Týrnır shveısarıalyq júıe boıynsha ótýde: birinshi kúni – 5 týr, ekinshi kúni – 4 týr. Ýaqytty baqylaý formaty – rapıd 10+5 (ár partıaǵa 10 mınýt jáne ár júris úshin qosymsha 5 sekýnd). Ár sanat boıynsha úzdik úsh komanda júldeli oryndarǵa ıe bolyp, aqshalaı syılyqtarmen marapattalady: 1-shi orynǵa – 350 000 teńge, 2-shi orynǵa – 250 000 teńge, 3-shi orynǵa – 150 000 teńge.
18 jasqa deıingi kategorıa favorıtteri:
Bul kategorıada bes komanda:
- Almatydaǵy RFMM (reıtıńi – 2215): Edgar Mamedov (2324), Zarına Nurǵalıeva (2081), Imanǵalı Ahılbaı (2288) – Londonda ótken komandalyq rapıd jáne blıs boıynsha álem chempıonatyna qatysqan.
- Astanadaǵy RFMM (2042): Erǵalı Súleımen (2336), komandalyq blıs boıynsha álem chempıonatynda 7-taqtada altyn medal ıegeri, Islam Áıten (2037), sol chempıonatta áýesqoılar arasynda rapıdten kúmis júldeger.
- Almaty qalasyndaǵy M. Gandı atyndaǵy №92 lıseı (1992): Mıras Asylov (2268), 2024 jylǵy álem chempıonatynda (O16) rapıdten kúmis jáne blısten qola júlde ıegeri.
- Almatydaǵy №173 lıseı (1953): Erlan Tleýhanov (2078), Elnaz Qalıahmet (2238) – 2025 jylǵy Qazaqstan chempıony.
- Astanadaǵy SEED Educational Complex (1941): Danıs Qýandyquly (2069), 2023 jylǵy álem chempıony (O-10), Marıa Holávko (1953), 2024 jylǵy Azıa chempıony (G14).
12 jasqa deıingi kategorıa favorıtteri:
Astanadaǵy RFMM komandasy (1690) kósh bastap tur. Komanda quramynda – Ámirjan Ánetov (1926), 2025 jylǵy álem chempıony (rapıd jáne blıs, O-10) bar. Qarsylastary da osal emes: Aqtóbe qalasyndaǵy D. Qonaev atyndaǵy gımnazıa komandasy (1576) – Amanbek Ótetileý (1859), Shymkent qalasyndaǵy O. Joldasbekov atyndaǵy №9 IT-lıseı komandasy (1562) – Nursaı Jumabek (1642).
Saltanatty ashylý rásimin kelesi «Respýblıkalyq fızıka-matematıka mektebi» KEAQ Basqarma tóraǵasynyń orynbasary Almas Qunǵojın, Almaty qalasyndaǵy RFMM fılıalynyń dırektory Meıirlan Meıirbek jáne KazChess bilim berý jobalary departamenti dırektorynyń orynbasary Ádıa Nurmanova ótkizdi. U-18 jáne U-12 sanattarynyń kóshbasshylary arasynda sımvolıkalyq alǵashqy júris jasaldy. Týrnırdiń bas tóreshisi Sergeı Kım jarystyń bastalǵanyn resmı túrde jarıalady.
2023 jyldyń tamyz aıynda Aqtaý qalasy mektep komandalary arasyndaǵy alǵashqy álem chempıonatyn qabyldady. Bul jarysqa 53 elden kelgen 300-den astam shahmatshy qatysty. Bir jyldan keıin Qazaqstan shahmat federasıasynyń prezıdenti Tımýr Týrlov Halyqaralyq mektep shahmat federasıasyn (ISCF) quryp, onyń tuńǵysh prezıdenti atandy. Qazirgi tańda FIDE men ISCF birlese otyryp, jańa álem chempıonatyn AQSH-tyń Vashıngton qalasyna irgeles ornalasqan Aleksandrıada uıymdastyrýda.
Almatydaǵy týrnır – álemdik arenaǵa shyǵýǵa múmkindik beretin jas talanttardyń tartysy. Alty komanda AQSH-qa attanyp, qazaqstandyq shahmattyń qýatyn álemge dáleldeýge múmkindik alady. Bul jarys – halyqaralyq dodalarda top jarǵan bolashaq juldyzdardyń oıyny. Týrnır asa tartysty jáne áserli bolmaq.
