بۇگىن، 19 ماۋسىم كۇنى الماتى قالاسىندا قازاقستاننىڭ ۇزدىك مەكتەپ كوماندالارى اراسىندا شاحمات ءتۋرنيرى باستالدى. بۇل ءتۋرنيردىڭ جەڭىمپازدارى 2025 جىلى وتەتىن مەكتەپ كوماندالارى اراسىنداعى الەم چەمپيوناتىنا FIDE World Schools Team Championship 2025) قاتىسۋ مۇمكىندىگىنە يە بولادى. ەڭ مىقتى التى كوماندا الەكساندريا قالاسىندا (اقش، ۆيردجينيا شتاتى) 2025 جىلعى 2-7 تامىز ارالىعىندا وتەتىن الەمدىك بىرىنشىلىككە جولداما الادى. جارىس رەسپۋبليكالىق فيزيكا-ماتەماتيكا مەكتەبىندە (بۇحار جىراۋ داڭعىلى، 36) ءوتىپ جاتىر جانە 20 ماۋسىمعا دەيىن جالعاسادى. بۇل جونىندە قازاقستان شاحمات فەدەراسياسىنىڭ باسپا ءسوز قىزمەتى مالىمدەدى،- دەپ حابارلايدى Dalanews.kz
12 جاسقا دەيىن (U12) جانە 18 جاسقا دەيىنگى (U18) ساناتتاردا سايكەسىنشە 21 جانە 20 كوماندا ب ا ق سىناۋدا. ءار كوماندا قۇرامىندا – ءبىر مەكتەپتەن شىققان ءۇش ۇل جانە ءبىر قىز بار (2024-2025 وقۋ جىلى ءۇشىن). تۋرنير شۆەيساريالىق جۇيە بويىنشا وتۋدە: ءبىرىنشى كۇنى – 5 تۋر، ەكىنشى كۇنى – 4 تۋر. ۋاقىتتى باقىلاۋ فورماتى – راپيد 10+5 (ءار پارتياعا 10 مينۋت جانە ءار ءجۇرىس ءۇشىن قوسىمشا 5 سەكۋند). ءار سانات بويىنشا ۇزدىك ءۇش كوماندا جۇلدەلى ورىندارعا يە بولىپ، اقشالاي سىيلىقتارمەن ماراپاتتالادى: 1ء-شى ورىنعا – 350 000 تەڭگە، 2ء-شى ورىنعا – 250 000 تەڭگە، 3ء-شى ورىنعا – 150 000 تەڭگە.
18 جاسقا دەيىنگى كاتەگوريا فاۆوريتتەرى:
بۇل كاتەگوريادا بەس كوماندا:
- الماتىداعى رفمم (رەيتينگى – 2215): ەدگار مامەدوۆ (2324)، زارينا نۇرعالييەۆا (2081)، يمانعالي احيلباي (2288) – لوندوندا وتكەن كوماندالىق راپيد جانە بليس بويىنشا الەم چەمپيوناتىنا قاتىسقان.
- استاناداعى رفمم (2042): ەرعالي سۇلەيمەن (2336)، كوماندالىق بليس بويىنشا الەم چەمپيوناتىندا 7-تاقتادا التىن مەدال يەگەرى، يسلام ايتەن (2037)، سول چەمپيوناتتا اۋەسقويلار اراسىندا راپيدتەن كۇمىس جۇلدەگەر.
- الماتى قالاسىنداعى م. گاندي اتىنداعى №92 ليسەي (1992): ميراس اسىلوۆ (2268)، 2024 جىلعى الەم چەمپيوناتىندا (و16) راپيدتەن كۇمىس جانە بليستەن قولا جۇلدە يەگەرى.
- الماتىداعى №173 ليسەي (1953): ەرلان تلەۋحانوۆ (2078)، ەلناز قالياحمەت (2238) – 2025 جىلعى قازاقستان چەمپيونى.
- استاناداعى SEED Educational Complex (1941): دانيس قۋاندىق ۇلى (2069)، 2023 جىلعى الەم چەمپيونى (و-10)، ماريا حولياۆكو (1953)، 2024 جىلعى ازيا چەمپيونى (G14).
12 جاسقا دەيىنگى كاتەگوريا فاۆوريتتەرى:
استاناداعى رفمم كومانداسى (1690) كوش باستاپ تۇر. كوماندا قۇرامىندا – ءامىرجان انەتوۆ (1926)، 2025 جىلعى الەم چەمپيونى (راپيد جانە بليس، و-10) بار. قارسىلاستارى دا وسال ەمەس: اقتوبە قالاسىنداعى د. قونايەۆ اتىنداعى گيمنازيا كومانداسى (1576) – امانبەك وتەتىلەۋ (1859)، شىمكەنت قالاسىنداعى و. جولداسبەكوۆ اتىنداعى №9 IT-ليسەي كومانداسى (1562) – نۇرساي جۇمابەك (1642).
سالتاناتتى اشىلۋ ءراسىمىن كەلەسى «رەسپۋبليكالىق فيزيكا-ماتەماتيكا مەكتەبى» كەاق باسقارما ءتوراعاسىنىڭ ورىنباسارى الماس قۇنعوجين، الماتى قالاسىنداعى رفمم فيليالىنىڭ ديرەكتورى مەيىرلان مەيىربەك جانە KazChess ءبىلىم بەرۋ جوبالارى دەپارتامەنتى ديرەكتورىنىڭ ورىنباسارى ءاديا نۇرمانوۆا وتكىزدى. U-18 جانە U-12 ساناتتارىنىڭ كوشباسشىلارى اراسىندا سيمۆوليكالىق العاشقى ءجۇرىس جاسالدى. ءتۋرنيردىڭ باس تورەشىسى سەرگەي كيم جارىستىڭ باستالعانىن رەسمي تۇردە جاريالادى.
2023 جىلدىڭ تامىز ايىندا اقتاۋ قالاسى مەكتەپ كوماندالارى اراسىنداعى العاشقى الەم چەمپيوناتىن قابىلدادى. بۇل جارىسقا 53 ەلدەن كەلگەن 300-دەن استام شاحماتشى قاتىستى. ءبىر جىلدان كەيىن قازاقستان شاحمات فەدەراسياسىنىڭ پرەزيدەنتى تيمۋر تۋرلوۆ حالىقارالىق مەكتەپ شاحمات فەدەراسياسىن (ISCF) قۇرىپ، ونىڭ تۇڭعىش پرەزيدەنتى اتاندى. قازىرگى تاڭدا FIDE مەن ISCF بىرلەسە وتىرىپ، جاڭا الەم چەمپيوناتىن اقش-تىڭ ۆاشينگتون قالاسىنا ىرگەلەس ورنالاسقان الەكساندريادا ۇيىمداستىرۋدا.
الماتىداعى تۋرنير – الەمدىك ارەناعا شىعۋعا مۇمكىندىك بەرەتىن جاس تالانتتاردىڭ تارتىسى. التى كوماندا اقش-قا اتتانىپ، قازاقستاندىق شاحماتتىڭ قۋاتىن الەمگە دالەلدەۋگە مۇمكىندىك الادى. بۇل جارىس – حالىقارالىق دودالاردا توپ جارعان بولاشاق جۇلدىزداردىڭ ويىنى. تۋرنير اسا تارتىستى جانە اسەرلى بولماق.
