Almatyda «Almaty – bizdiń ortaq úiimiz» naýqany, respýblikalyq «Taza Qazaqstan» baǵdarlamasy jáne jańa kóriktendirý erejeleri aiasynda 6 039 biznes nysanyn tólqujattaý aiaqtaldy. 1 sáýirden bastap kásipkerler úshin kóriktendirý tólqujatyn mindetti túrde saqtaý engiziledi, dep habarlaidy Dalanews.kz
Kóriktendirýge kim jaýapty?
Jańa talapqa sáikes, árbir biznes kóriktendirý tólqujatyn alyp, oǵan tiesili aýmaqtyń tazalyǵy men tártibin saqtaýǵa mindetti. Bul talap menshik nysanyna qaramastan barlyq kásipkerge qatysty. Ǵimarat ieleri, sondai-aq PIK, MIB, QS siiaqty zańdy jáne jeke tulǵalar men jer paidalanýshylar aýmaǵynyń tazalyǵyn qamtamasyz etip, ǵimarat qasbetteriniń ýaqytyly jóndelýi men syrlanýyn qadaǵalaýǵa tiis. Sonymen qatar, olar eskertkish taqtalar, kóshe kórsetkishteri (tuiyq kósheler men alańdardy qosqanda), nómirlik belgiler, mańdaishalar men aqparattyq taqtaishalardyń tazalyǵyn jáne durystyǵyn saqtaýǵa mindetti.
Qys mezgilinde ǵimarat ieleri turǵyndar men jalǵa alýshylardy qar men muzdy tazalaý jumystary týraly aldyn ala habardar etýge tiis.
Talaptardyń oryndalýyn kim qadaǵalaidy?
Kóriktendirý tólqujatynyń talaptarynyń oryndalýyn aýdan ákimdikteriniń kóriktendirý jáne ekologiia bólimi baqylaidy.
Talaptar saqtalmasa ne bolady?
Talapty buzǵan kásipkerler Qazaqstan Respýblikasynyń Ákimshilik quqyq buzýshylyq týraly kodeksiniń 505-baby boiynsha ákimshilik jaýapkershilikke tartylady. Shaǵyn biznes sýbektileri men kommertsiialyq emes uiymdar úshin aiyppul mólsheri – 30 AEK. Orta biznes sýbektileri úshin – 40 AEK. Iri biznes sýbektileri úshin – 100 AEK.
Biznes qalai tartyldy?
Tólqujattaý úderisi 2024 jyly kóriktendirý erejeleriniń jańartylýynan keiin bastaldy. Bul úderisti jedeldetýde «Jaýapty biznes – kórikti qala» bastamasy mańyzdy ról atqardy. Ol «Almaty – bizdiń ortaq úiimiz» naýqany aiasynda júzege asyryldy. Aýdan ákimdikteriniń kásipkerlik bólimi biznes ielerimen kezdesip, kóriktendirý tólqujattaryn engizý jáne talaptardy oryndaý boiynsha túsindirý jumystaryn júrgizdi. Tólqujattaýǵa aýdan ákimdigi men kásipkerler birlese qol qoidy.
Tólqujattaý qorytyndysy boiynsha almatylyq kásipkerler oiyn aitty.
«Bul tólqujatqa qol qoiǵanymyzǵa qaramastan, biz árdaiym durys kóriktendirý talaptaryn ustanamyz. Bizde arnaiy qyzmetkerler bar, olar aýmaqty qadaǵalap otyrady. Basqa kompaniialardy da tazalyqty saqtaýǵa, aýmaǵyn retke keltirýge shaqyramyn, óitkeni qalamyzdyń taza ári gúldengeni bárimizge mańyzdy», – dedi Sevalo kompaniiasynyń menedjeri Syrym Ysqaqov.
