Qoǵam belsendisi Sanjar Boqaev Almatydaǵy Úlken Almaty ózeniniń boiynan tabiǵi granit plitalarynyń zańsyz tasymaly júrip jatqanyn áshkereledi, dep habarlaidy Dalanews.kz.
Túngi baqylaý
Boqaevtyń aitýynsha, jergilikti turǵyndar ózen jaǵasynan túsirilgen beinejazbalardy jiberip, túnde júk kólikterine granit plitalary tielip jatqanyn habarlaǵan. Osydan keiin ol tún ishinde oqiǵa ornyna baryp, kúdikti áreketterdi baqylaǵan.
"Biz kelgennen keiin bir manipýliator júk kóligin kórdik. Ol plitalardy tiep alyp ketti. Artynsha taǵy bir kólik kelip toqtady. Biz ázirge jaqyndamai, qaida aparatynyn baqylap kórýdi uiǵardyq. Óitkeni munyń bári politsiianyń kóz aldynda bolyp jatyr", – deidi Sanjar Boqaev.
Belsendi kóliktiń tún ortasynda ǵana júrýin kúdikti jaǵdai dep baǵalady:
"Eger bári zańdy bolsa, nege kúndiz tasymaidy? Nege tek túnde jasyryn aparady?" – dep suraq qoidy ol.
Alǵashynda Boqaev plitalardyń qala ákimdiginiń bazasyna jetkizilýi múmkin ekenin topshylaǵan. Óitkeni granit plitalary ákimdiktiń múlki bolyp sanalady.
Alaida kólik qala syrtyna bet alǵan.
"Biz Besaǵash arqyly Talǵar aýdanyna shyqtyq. Aqyry kóliktiń jeke menshik úige qarai burylǵanyn kórdik. Bul meni shoshytty. Óitkeni plitalardy ákimdik bazasyna emes, múrde tas qoiatyn tsehqa aparyp túsirdi. Sonda olar ákimdik múlkin satyp jatyr ma?" – dep narazylyǵyn bildirdi Boqaev.
Boqaev tastardy tasyǵan jumysshylardyń birimen sóilesken.
- Tasty qaidan alyp kele jatyrsyz?
- Úiden... Qoqys tastaityn jerden... Áiteiden
- Myna jerge ne úshin alyp kelip jatyrsyz?
- Bul synǵan zattar ǵoi
- Synbaǵan, bútin ǵoi, deidi Sanjar Boqaev.
"Olardy múrde tasyn jasaityn tsehtarǵa satyp jatyr. Muny tipti túsindirýge de tilim barmaidy, bilesizder me, sonshalyqty jaǵymsyz tirlik", - deidi Sanjar.
Qoǵam belsendisi granit tastardy qaitadan qalaǵa aparýdy talap etti.
