Almaty qalasynyń mamandandyrylǵan aýdanaralyq qylmystyq soty adam aǵzalaryn zańsyz satyp alý jáne satý isimen ainalysqan tulǵalarǵa úkim shyǵardy, dep habarlaidy Dalanews.kz Halyqstan telegram arnasyna silteme jasap.
Uiymdasqan qylmysqa qarsy kúres basqarmasy bul atyshýly qylmystyq istiń qatysýshylaryn 2023 jyldyń kúzinde birneshe óńirde ustaǵan bolatyn. Kúdiktiler qatarynda tek aǵza izdeýshiler ǵana emes, dárigerler men notariýstar da boldy. Alaida tergeý barysynda eki ondaǵan kúdiktiniń ishinen tek ekeýi sot aldynda jaýap berdi, onyń ózinde ekeýi de shartty jaza aldy.
Búirek jetkiliksizdiginen zardap shekken Islam Uzaqbai 2021 jyly Túrkiiada búirek transplantatsiiasyn jasatyp, keiin Almatydaǵy meditsinalyq ortalyqtardyń birinde em qabyldady.
Dál sol kezde ol donorlar men retsipientterdi tabý arqyly aqsha tabý ideiasyn oilastyra bastady. Bul isti jalǵyz ózi júzege asyra almaitynyn túsinip, tergeý anyqtai almaǵan Aiman esimdi azamatshamen kelisimge keldi.
Gemodializ seanstarynyń birinde ol búirek transplantatsiiasyna muqtaj jigitpen tanysyp, oǵan 10 million teńgege donor tabýdy usyndy. Naýqas jigit aldymen otbasymen keńesetinin aitqanymen, Uzaqbai ony kóndirýge tyrysty. Ol jii habarlasyp, hal-jaǵdaiyn surap, senimine kirdi.
Naýqastyń densaýlyǵy kúrt nasharlap, gemodializ kómektespei qalǵan kezde, ol aǵasymen birge Uzaqbaimen kezdesip, búirek aýystyrýǵa jáne donor izdeýge kelisim berdi.
Uzaqbai olarǵa operatsiianyń resmi túrde jáne kvota arqyly jasalatynyna sendirdi. Biraq kvotaǵa kezeksiz iligý úshin 10 million teńge tóleý qajet ekenin aitty.
Osy ýaqytta Aiman internetten donor izdep, astanalyq Dúisenbai Erejeni tapty. Ol 8 million teńge úshin búiregin berýge daiyn boldy. Aiman operatsiiany Almatydaǵy Syzǵanov atyndaǵy Ulttyq ǵylymi hirýrgiia ortalyǵynda uiymdastyratynyn ýáde etti.
Atalǵan ortalyqta donor men retsipient meditsinalyq tekserýden ótip, keiin ota jasaldy. Operatsiiadan keiin Uzaqbai donorǵa berilýi kerek degen syltaýmen taǵy 10 million teńge talap etti. Osylaisha, alǵashqy klienti bir búirekke 20 million teńge jumsady.
Budan aqsha tabýǵa bolatynyn túsingen Uzaqbai donor izdeýmen ainalysýdy Erejege usyndy jáne ár búirek úshin 500 myń teńge tóleitinin aitty.
Osylaisha, kelesi klient – Qazbek Aqsaqalov pen donor – Darhan Sqabyl tabyldy.
Belgilengen shema boiynsha olar meditsinalyq tekserýden ótip, Syzǵanov atyndaǵy ǵylymi-zertteý institýtynda operatsiiaǵa daiyndalyp jatqan kezde politsiia qyzmetkerleri olardy ustady.
Sqabyl QR Qylmystyq kodeksiniń 116-babynyń 1-bóligi («Adam aǵzalary men tinderin alýǵa májbúrleý nemese zańsyz alý») boiynsha aiyptaldy.
Al bul zańsyz shemanyń uiymdastyrýshysy – Uzaqbai dál osy baptyń 2-bóligi boiynsha jaýapqa tartyldy.
Sýdia Erlan Bolatov Sqabyldy 2 jylǵa, al Uzaqbaidy 4 jylǵa shartty túrde bas bostandyǵynan aiyrý jazasyna kesti.
