الماتى قالاسىنىڭ مامانداندىرىلعان اۋدانارالىق قىلمىستىق سوتى ادام اعزالارىن زاڭسىز ساتىپ الۋ جانە ساتۋ ىسىمەن اينالىسقان تۇلعالارعا ۇكىم شىعاردى، دەپ حابارلايدى Dalanews.kz Halyqstan تەلەگرام ارناسىنا سىلتەمە جاساپ.
ۇيىمداسقان قىلمىسقا قارسى كۇرەس باسقارماسى بۇل اتىشۋلى قىلمىستىق ءىستىڭ قاتىسۋشىلارىن 2023 جىلدىڭ كۇزىندە بىرنەشە وڭىردە ۇستاعان بولاتىن. كۇدىكتىلەر قاتارىندا تەك اعزا ىزدەۋشىلەر عانا ەمەس، دارىگەرلەر مەن نوتاريۋستار دا بولدى. الايدا تەرگەۋ بارىسىندا ەكى ونداعان كۇدىكتىنىڭ ىشىنەن تەك ەكەۋى سوت الدىندا جاۋاپ بەردى، ونىڭ وزىندە ەكەۋى دە شارتتى جازا الدى.
بۇيرەك جەتكىلىكسىزدىگىنەن زارداپ شەككەن يسلام ۇزاقباي 2021 جىلى تۇركيادا بۇيرەك ترانسپلانتاسياسىن جاساتىپ، كەيىن الماتىداعى مەديسينالىق ورتالىقتاردىڭ بىرىندە ەم قابىلدادى.
ءدال سول كەزدە ول دونورلار مەن رەسيپيەنتتەردى تابۋ ارقىلى اقشا تابۋ يدەياسىن ويلاستىرا باستادى. بۇل ءىستى جالعىز ءوزى جۇزەگە اسىرا المايتىنىن ءتۇسىنىپ، تەرگەۋ انىقتاي الماعان ايمان ەسىمدى ازاماتشامەن كەلىسىمگە كەلدى.
گەمودياليز سەانستارىنىڭ بىرىندە ول بۇيرەك ترانسپلانتاسياسىنا مۇقتاج جىگىتپەن تانىسىپ، وعان 10 ميلليون تەڭگەگە دونور تابۋدى ۇسىندى. ناۋقاس جىگىت الدىمەن وتباسىمەن كەڭەسەتىنىن ايتقانىمەن، ۇزاقباي ونى كوندىرۋگە تىرىستى. ول ءجيى حابارلاسىپ، حال-جاعدايىن سۇراپ، سەنىمىنە كىردى.
ناۋقاستىڭ دەنساۋلىعى كۇرت ناشارلاپ، گەمودياليز كومەكتەسپەي قالعان كەزدە، ول اعاسىمەن بىرگە ۇزاقبايمەن كەزدەسىپ، بۇيرەك اۋىستىرۋعا جانە دونور ىزدەۋگە كەلىسىم بەردى.
ۇزاقباي ولارعا وپەراسيانىڭ رەسمي تۇردە جانە كۆوتا ارقىلى جاسالاتىنىنا سەندىردى. ءبىراق كۆوتاعا كەزەكسىز ىلىگۋ ءۇشىن 10 ميلليون تەڭگە تولەۋ قاجەت ەكەنىن ايتتى.
وسى ۋاقىتتا ايمان ينتەرنەتتەن دونور ىزدەپ، استانالىق دۇيسەنباي ەرەجەنى تاپتى. ول 8 ميلليون تەڭگە ءۇشىن بۇيرەگىن بەرۋگە دايىن بولدى. ايمان وپەراسيانى الماتىداعى سىزعانوۆ اتىنداعى ۇلتتىق عىلىمي حيرۋرگيا ورتالىعىندا ۇيىمداستىراتىنىن ۋادە ەتتى.
اتالعان ورتالىقتا دونور مەن رەسيپيەنت مەديسينالىق تەكسەرۋدەن ءوتىپ، كەيىن وتا جاسالدى. وپەراسيادان كەيىن ۇزاقباي دونورعا بەرىلۋى كەرەك دەگەن سىلتاۋمەن تاعى 10 ميلليون تەڭگە تالاپ ەتتى. وسىلايشا، العاشقى كليەنتى ءبىر بۇيرەككە 20 ميلليون تەڭگە جۇمسادى.
بۇدان اقشا تابۋعا بولاتىنىن تۇسىنگەن ۇزاقباي دونور ىزدەۋمەن اينالىسۋدى ەرەجەگە ۇسىندى جانە ءار بۇيرەك ءۇشىن 500 مىڭ تەڭگە تولەيتىنىن ايتتى.
وسىلايشا، كەلەسى كليەنت – قازبەك اقساقالوۆ پەن دونور – دارحان سقابىل تابىلدى.
بەلگىلەنگەن سحەما بويىنشا ولار مەديسينالىق تەكسەرۋدەن ءوتىپ، سىزعانوۆ اتىنداعى عىلىمي-زەرتتەۋ ينستيتۋتىندا وپەراسياعا دايىندالىپ جاتقان كەزدە پوليسيا قىزمەتكەرلەرى ولاردى ۇستادى.
سقابىل ق ر قىلمىستىق كودەكسىنىڭ 116-بابىنىڭ 1-بولىگى («ادام اعزالارى مەن تىندەرىن الۋعا ماجبۇرلەۋ نەمەسە زاڭسىز الۋ») بويىنشا ايىپتالدى.
ال بۇل زاڭسىز سحەمانىڭ ۇيىمداستىرۋشىسى – ۇزاقباي ءدال وسى باپتىڭ 2-بولىگى بويىنشا جاۋاپقا تارتىلدى.
سۋديا ەرلان بولاتوۆ سقابىلدى 2 جىلعا، ال ۇزاقبايدى 4 جىلعا شارتتى تۇردە باس بوستاندىعىنان ايىرۋ جازاسىنا كەستى.
