Almatyda 28 gvardiiashy-panfilovshylar atyndaǵy saiabaqtaǵy Dańq memorialy aýmaǵynda qalpyna keltirý jumystary qolǵa alyndy. Bul jumystar Uly Otan soǵysyndaǵy Jeńistiń 80 jyldyǵyn atap ótýge orai uiymdastyrylǵan,- dep habarlaidy Dalanews.kz
Qalpyna keltirý jumystary arnaiy komissiianyń tekserisi nátijesinde bastaldy. Komissiia memorialdaǵy granitti jáne tas plitalardyń, sondai-aq kespe tastyń tozý deńgeiin baǵalady.
Memorialdyq keshenge 50 jyl boldy, osy ýaqyt ishinde onyń granitti jabyndysy, tas taqtalary men kespe tastary aitarlyqtai tozǵan, jaryqtar men kei jerlerde buzylý belgileri paida bolǵan. Bul aýmaqta sońǵy 20 jylda jóndeý jumystary júrgizilmegen, sondyqtan memorialdyń tarihi kelbetin saqtai otyryp, ony bastapqy qalpyna keltirý týraly sheshim qabyldandy.
Qalpyna keltirý jumystary Dańq memorialynyń ortalyq bóligi – «Máńgilik alaý» tuǵyrynyń granitti tastaryn qummen tazalaýdy qamtidy. Sonymen qatar, granitti taqtatas tazalanyp, jańartylyp, memorialdyq keshen men Voznesensk sobory arasyndaǵy kespe tas aýystyrylady. Jóndeý jumystaryn 2025 jyldyń sáýir aiynda aiaqtaý josparlanyp otyr.
Bul bastamaǵa Keńes Odaǵynyń Batyry, áigili qolbasshy Ivan Panfilovtyń nemeresi – Alýa Baiqadamova da qoldaý bildirdi.
«Máńgilik alaýdaǵy» taqtalar 50 jyl boiy jaýyn-shashyn, qar, aptap ystyq jáne temperatýranyń aýytqýynan zardap shekti. Almatyda aýa raiy kúrt ózgeredi. Sońǵy 15 jylda memorialdyń buzylýyna skeitbordshylar, samokatshylar men velosipedshiler de úles qosty. Olarǵa eskertkishke mán bermedi. Osy faktorlardyń barlyǵy granit taqtalardyń jarylýyna alyp keldi. Taqta astyndaǵy beton is júzinde qumǵa ainalǵany da anyqtaldy. Qazirgi tańda zaqymdanǵan beton qabaty alynyp, armatýra jańartylyp, qiraǵan taqtalar ǵana aýystyrylyp jatyr», – dep jazdy Alýa Baiqadamova áleýmettik jelide.
28 gvardiiashy-panfilovshylar atyndaǵy saiabaq – tarihi-sáýlet jáne memorialdyq keshen. Ol 1942 jyly Máskeýdi qorǵaýda erlikpen qaza tapqan 28 panfilovshy batyrdyń qurmetine ataldy. Al memorialdyq keshen 1975 jyly 8 mamyrda, Uly Jeńistiń 30 jyldyǵynda ashyldy.
Esterińizge sala keteiik, 2024 jyldyń kúzinde saiabaqtyń Qazybek bi kóshesi men Panfilov eskertkishi mańyndaǵy aýmaǵy jóndeýden ótti. Bul jerdegi taqtalar, pandýstar jáne baspaldaqtar ábden tozyp, jańartýdy qajet etti. 500 sharshy metr aýmaqta granitti taqtalar tóselip, pandýstar ornatylyp, jańbyr sýyn aǵyzý júiesi júrgizildi.
