Almatyda 230-dan asa adam alaiaqtarǵa aldanyp, avtonesie rásimdep, qaryzǵa belsheden batqan. Avtopark ashyp, adamdarǵa aqsha tabýdy usynǵan kásipker júzdegen kólikti shetelge satyp, salymshylardy taqyrǵa otyrǵyzyp ketipti. Endi qaltada kók tiyn qalmady dep shyryldaǵan kópshilik quzyrlylardan tezirek áreket etýdi surap otyr. Sebebi olardyń milliondaǵan qaryzy kún sanap kóbeiip keledi, – dep habarlaidy Dalanews.kz Almaty.tv-ǵa siltep.
9 ai boiy ádildikke jetemiz dep úmitterin úzbegen turǵyndar qaladaǵy barlyq quzyrly mekemeniń tabaldyryǵyn tozdyrǵanyn aitady. Biri bul kompaniianyń jarqyn jarnamasyna elitse, endi birine tanystary ońai aqsha tabýdyń jolyn siltegen eken. Avtopark ashý úshin adam jinap, kólik izdegen kásipker basynda ár salymshyǵa qomaqty qarajat berip, avtonesieni alǵashqy 3 aida jaýyp otyrǵan. Artynsha habarsyz ketip, 231-den asa adamdy san soqtyryp ketti.
"Barlyǵymyz kólikter kepilge qoiylǵanyn oilap, tynysh boldyq, bul bizdi aldap ketpeitininiń dáleli sekildi kórindi, barlyq qujat qolymyzda edi. Biraq artynsha biz oilamaǵan sumdyq boldy, kólikterdiń bári urlanyp ketken, kóbi Reseige shyǵarylyp, satylyp úlgeripti. Ózimiz júgirip júrip, nómiri boiynsha izdep, jartysyn ǵana taptyq", – dedi qala turǵyny Erkeǵali Maqsutov.
"Ol kólikter jalǵa beriledi, ýaiymdamańyz dep ýáde bergen edi. Mende jalpy somasy 26 million 960 myń teńge, men ony tólei almaimyn, mende ondai aqsha da joq", – deidi qala turǵyny Ánýar Shákirov.
Jalǵan avtoparkke aldanǵan ár adam keminde 15 million teńgege jýyq qaryzǵa uryndy.
Prokýratýra ókilderiniń sózinshe, keltirilgen materialdyq shyǵyn áli eseptelip jatyr. Bul oqiǵadan keiin talai otbasynyń shańyraǵy shaiqalyp, úisiz-kúisiz qalǵan jandar kóbeigen kórinedi.
"Alaiaqtar aldap, bulardyń kólikterin shetelge shyǵarǵan. Reseidiń árbir qalasynda sol kólikterdi satylyp jatqan jerinen baryp tapty. Qazaqstanda bankte kepildikte turǵan kólikterdi nege Reseide satyp otyr? Ekinshiden, endi zardap shekkender Máskeýge, Saratovqa baryp kelip júr. Kólikterin qaitara almai jatyr, qaitaratyn zań da joq", – dedi qoǵamdyq qordyń basshysy Bibinur Sherálieva.
Zańsyz paida tabý jolyn oilastyryp, júzdegen adamdy quryqqa túsirgen alaiaq qazir qamaýda otyr, biraq jábirlenýshilerdiń zańgeri iste taǵy birneshe qylmysker baryn alǵa salyp, olarǵa qatysty is qozǵaýdy talap etip otyr.
"Bizdiń aryzymyzdan keiin bank qyzmetkerlerine qatysty jáne kólikterdi basqa elge, Reseige tasyǵan tasymaldaýshylarǵa qatysty qylmystyq is tirkelgen. Sol qylmystyq is aiasynda biz ádilettilik ornatamyz dep ýáde berdi. Bul qylmystyq is boiynsha shet memleketke kólikterdi alyp ketken adamdar týraly málimetter aldym, olardyń bári buryn sotty bolǵan eken", – dedi zańger Ǵabit Ómirbek.
Jábirlenýshilerdiń basty tilegi – barlyq alaiaqty ustap, qaryzdarynan qutylý.
"Qazirgi tańda Almaty qalasy Jetisý aýdandyq basqarmasy kúdikti Ermaǵambetke qatysty QR Qylmystyq kodeksiniń 190-baby 4-bóligi 2-tarmaǵymen tekseris bastady. Oǵan qatysty bultartpaý sharasy qoldanylǵan", – dedi tergeý basqarmasy bastyǵynyń orynbasary Dáýren Dinbaev.
