Almatyda nóser jańbyr Amanjol kóshesin taǵy da shaiyp ketti. Qala ákimdiginiń baspasóz qyzmeti ókili mán-jaidy aitty, dep habarlaidy Dalanews.kz.
Mán-jaiy
23 qyrkúiekte Almatyda jaýǵan qatty jańbyrdan keiin Amanjol kóshesiniń bir bóligi qaita búlindi. Jergilikti turǵyndardyń aitýynsha, jaýynnan keiin bul kóshe tutas aryqqa ainalady. Bir apta buryn dál osy jerde birden 13 kólik shuńqyrǵa túsip ketken edi.
Turǵyn túsirgen videoda adamdardyń tastan tasqa sekirip, kósheden ótip jatqany kórinedi. Onyń aitýynsha, bul másele osy jerde 20 jyldan beri sheshilmei keledi.
"Ár nóserden keiin ony kómip, jóndeidi, biraq jaýyn bárin taǵy shaiyp ketedi. Men bul jerde 20 jyldan beri turamyn, másele sol kúii sheshilmedi", – deidi turǵyndardyń biri.
Ákimdik jaýaby
Áýezov aýdany ákimdigi málimetinshe, Amanjol kóshesinde injenerlik jelilerdi júrgizý boiynsha jer qazý jumystary saldarynan aryq júiesinde bóget paida bolyp, jaýyn sýy jinalǵan.
"Jaýyn-shashyn bastalǵanǵa deiin sý basý jáne topyraqtyń shaiylý qaýpi bar ýchaskeler jabylǵan bolatyn. Qazir bul aýmaqta jaýyn sýyn aryq júiesine burý úshin 5 tehnika men 15 jumysshy jumyldyryldy. Jol tóseminiń astyndaǵy ótkelderdi tazalaý jumystary júrgizilip jatyr, jaǵdai tolyq baqylaýda", - dedi ákimdik ókilderi.
Sonymen qatar, ákimdik ókilderi Amanjol kóshesinde qazir QAZAQGAZ AIMAQ AQ tarapynan gaz qubyryn salý jumystary júrip jatqanyn, bul jumystar aiaqtalǵan soń jol tósemine abattandyrý jumystary júrgiziletinin málimdedi.
