"Human Rights Lawyers" qoǵamdyq qory Almatyda 13 jastaǵy jasóspirim qyzǵa qatysty qozǵalǵan qylmystyq is boiynsha málimdeme jasap, birqatar quqyqtyq máselege nazar aýdardy, dep habarlaidy Dalanews.kz.
Qor taratqan aqparatqa sáikes, oqiǵa 2025 jylǵy 1 qyrkúiekte Almatyda bolǵan. Uiymnyń málimetinshe, kúdikti - qyzdyń ákesiniń dosy. Ata-anasy ajyrasqan.
Oqiǵa bolǵan kezde qyzdyń anasy mas kúiinde kólik basqarǵany úshin sot úkimimen qaýipsizdigi eń tómen mekemede jazasyn ótep júrgen. Uiym ókilderi osy kezeńde anasyna qylmys jasalǵany, tergeý amaldarynyń bastalǵany jáne sot protsesteri týraly resmi túrde habar berilmegenin alǵa tartty.
Qor dereginshe, anasy bul jaǵdaidan tek shamamen alty ai ótken soń ǵana habardar bolǵan. Uiym sondai-aq osy ýaqyt ishinde jábirlenýshi tarapqa tiisti psihologiialyq kómek kórsetilmegenin málimdedi.
Human Rights Lawyers málimetine sáikes, tergeý barysynda qyzǵa kúdiktiniń týystary men advokattary tarapynan yqpal jasalýy múmkin degen kúdik bar. Saldarynan jasóspirim sotta bastapqy aiǵaqtaryn ózgertken.
Sonymen birge uiym qolynda iske qatysty jekelegen materialdar, sonyń ishinde áńgimelerdiń jazbalary men ózge de dálelder bar ekenin habarlady. Saraptama qorytyndysy boiynsha jynystyq sipattaǵy áreketke bailanysty belgilerdiń bir bóligi rastalǵany aitylǵan.
Qoǵamdyq qor quzyrly memlekettik organdardy atalǵan istiń barlyq mán-jaiyn jan-jaqty, ashyq ári ádil tekserýge shaqyrdy jáne jábirlenýshi men onyń anasynyń quqyqtaryn qorǵaýdy qamtamasyz etýdi surady.
Qazirgi ýaqytta quqyq qorǵaý organdary bul jaǵdaiǵa qatysty resmi túsinikteme bergen joq.
