"Human Rights Lawyers" قوعامدىق قورى الماتىدا 13 جاستاعى ءجاسوسپىرىم قىزعا قاتىستى قوزعالعان قىلمىستىق ءىس بويىنشا مالىمدەمە جاساپ، ءبىرقاتار قۇقىقتىق ماسەلەگە نازار اۋداردى، دەپ حابارلايدى Dalanews.kz.
قور تاراتقان اقپاراتقا سايكەس، وقيعا 2025 جىلعى 1 قىركۇيەكتە الماتىدا بولعان. ۇيىمنىڭ مالىمەتىنشە، كۇدىكتى - قىزدىڭ اكەسىنىڭ دوسى. اتا-اناسى اجىراسقان.
وقيعا بولعان كەزدە قىزدىڭ اناسى ماس كۇيىندە كولىك باسقارعانى ءۇشىن سوت ۇكىمىمەن قاۋىپسىزدىگى ەڭ تومەن مەكەمەدە جازاسىن وتەپ جۇرگەن. ۇيىم وكىلدەرى وسى كەزەڭدە اناسىنا قىلمىس جاسالعانى، تەرگەۋ امالدارىنىڭ باستالعانى جانە سوت پروسەستەرى تۋرالى رەسمي تۇردە حابار بەرىلمەگەنىن العا تارتتى.
قور دەرەگىنشە، اناسى بۇل جاعدايدان تەك شامامەن التى اي وتكەن سوڭ عانا حاباردار بولعان. ۇيىم سونداي-اق وسى ۋاقىت ىشىندە جابىرلەنۋشى تاراپقا ءتيىستى پسيحولوگيالىق كومەك كورسەتىلمەگەنىن مالىمدەدى.
Human Rights Lawyers مالىمەتىنە سايكەس، تەرگەۋ بارىسىندا قىزعا كۇدىكتىنىڭ تۋىستارى مەن ادۆوكاتتارى تاراپىنان ىقپال جاسالۋى مۇمكىن دەگەن كۇدىك بار. سالدارىنان ءجاسوسپىرىم سوتتا باستاپقى ايعاقتارىن وزگەرتكەن.
سونىمەن بىرگە ۇيىم قولىندا ىسكە قاتىستى جەكەلەگەن ماتەريالدار، سونىڭ ىشىندە اڭگىمەلەردىڭ جازبالارى مەن وزگە دە دالەلدەر بار ەكەنىن حابارلادى. ساراپتاما قورىتىندىسى بويىنشا جىنىستىق سيپاتتاعى ارەكەتكە بايلانىستى بەلگىلەردىڭ ءبىر بولىگى راستالعانى ايتىلعان.
قوعامدىق قور قۇزىرلى مەملەكەتتىك ورگانداردى اتالعان ءىستىڭ بارلىق ءمان-جايىن جان-جاقتى، اشىق ءارى ءادىل تەكسەرۋگە شاقىردى جانە جابىرلەنۋشى مەن ونىڭ اناسىنىڭ قۇقىقتارىن قورعاۋدى قامتاماسىز ەتۋدى سۇرادى.
قازىرگى ۋاقىتتا قۇقىق قورعاۋ ورگاندارى بۇل جاعدايعا قاتىستى رەسمي تۇسىنىكتەمە بەرگەن جوق.
