Almaty haıýanattar baǵy kelýshiler sany boıynsha jańa rekord ornatty. Sońǵy 37 jylda alǵash ret bir jyl ishinde kelýshiler sany 1 097 236 adamǵa jetti,- dep habarlaıdy Dalanews.kz
Aıta keteıik, qalalyq haıýanattar baǵynda 361 túrge jatatyn 3 838 janýar bar. Olardyń kútimimen 223 qyzmetker aınalysady.
2024 jyly jalpy zoobaqqa kelgen halyqtyń 250 myńy tegin kirdi. Bul – 6 jasqa deıingi balalar, balalar úıleri men mektep-ınternattardyń tárbıelenýshileri, kópbalaly jáne az qamtylǵan otbasyndǵy balalar (aýdan ákimdikteriniń haty boıynsha), sondaı-aq zeınetkerler men múmkindigi shekteýli jandar. Al, qalǵandary bılet satyp alyp kirgen.
Jalpy bılet baǵasy da qoljetimdi bolyp qala beredi: eresekter úshin – 800 teńge, al balalar úshin – 300 teńge. Kelýshiler sanynyń jańa rekordyna haıýanattar baǵynyń artyp kele jatqan tanymaldyǵy sebep bolǵan. Ol tabıǵatty súıetinder men otbasylyq demalysty qalaıtyn adamdar úshin tartymdy orynǵa aınalyp otyr.
Aıta keteıik, haıýanattar baǵyn halyqaralyq standartqa sáıkes jańǵyrtý jáne rekonstrýksıalaý josparlanǵan. Bıyl jobalyq-smetalyq qujattamany ázirleý boıynsha baıqaý jarıalanady. Keıin kezeń-kezeńimen rekonstrýksıa jumystary bastalyp, 2028 jylǵa deıin jalǵasady.
«Kelýshilerdiń, ásirese balalardyń, qyzyǵýshylyǵyn arttyrý jáne tanymdyq deńgeıin kóterý maqsatynda haıýanattar baǵynda ár janýar boıynsha anotasıalyq taqtaıshalar ázirlengen. Onda janýardyń ataýy, taralý aımaǵy, bıologıalyq erekshelikteri men qyzyqty faktiler kórsetilgen. Barlyq aqparat kelýshilerge yńǵaıly bolý úshin qazaq, orys jáne aǵylshyn tilderinde usynylǵan. Sonymen qatar, haıýanattar baǵynda navıgasıalyq jáne aqparattyq stendter men ınteraktıvti elementter ornatylǵan. Biz balalarǵa arnalǵan túrli úıirmeler men zoomektep jumysyn da uıymdastyryp kelemiz», – dedi haıýanattar baǵynyń ákimshiligi.
2023 jyly haıýanattar baǵyna 954 myń, al 2022 jyly 916 myńnan astam adam kelgen.
