Qala ákimi aýdandy aralaý kezinde 65 orynǵa eseptelgen qalalyq revmatologiialyq ortalyqta boldy. Medmekemeniń bas dárigeri A. Kúlembaevanyń aitýynsha, Almatyda revmatoidty dertke shaldyqqan 11 myńǵa jýyq adam bar eken. Sondyqtan olarǵa ýaqtyly meditsinalyq kómek kórsetý úshin meditsinalyq mekemeni keńeitý qajet. Jaǵdaidy zerttegen Baqytjan Saǵyntaev tósek-oryn sanyn 200-250-ge deiin arttyrý úshin ortalyqtyń jańa korpýstaryn salý jobasyn ázirleýdi tapsyrdy.
Emhanaǵa 30 myńnan astam adam bekitilgen. 1955 jyly salynǵan ǵimarat 10 jyl buryn jóndelgen. Almaty ákimi Baqytjan Saǵyntaevtyń tapsyrmasy boiynsha emhanany seismikalyq nyǵaitý jáne kúrdeli jóndeýden ótkizý múmkindigi qarastyrylatyn bolady.
Qala ákimi aýdannyń bilim berý infraqurylymynyń damýymen tanysty. Oqýshylar oryndarynyń tapshylyǵyn azaitý maqsatynda №34 mektep-gimnaziiasynyń 600 oryndy jańa korpýsy salynýda. Sonymen qatar, Qabanbai batyr kóshesiniń boiynda jeke investor buryn qurylysy toqtaǵan nysan negizinde 856 oryndy daryndy balalarǵa arnalǵan mektep salyp jatyr. Balalardyń deneshynyqtyrýyn damytý úshin MJÁ aiasynda №128 mektep aýmaǵynda kópfýnktsionaldy sport kesheni salynýda. Barlyǵy 11 sport kesheni salynady, al mektep janyndaǵy qoldanystaǵy 33 sport alańy modernizatsiialanady.
Sondai-aq, Baqytjan Saǵyntaev DEPO Evolution Park-tiń qurylys barysymen tanysty, munda kreativti indýstriia jobalaryn iske asyrýǵa arnalǵan alań jasalatyn bolady.
Maqataev skverinde qala ákimine «Býkkrossing» kóshpeli kitaphana jobasy tanystyryldy, munda árkim kitap ala alady, ózinikin qaldyrady nemese qalaǵan basylymyn oqýǵa alady. Aýdannyń saiabaqtary men skverlerinde osyndai 10 kitaphana ornatý josparlanýda.
Jumys sapary barysynda qala ákimine jeke investor esebinen Máýlenov kóshesin abattandyrý jobalary kórsetildi. B. Saǵyntaev Seifýllin dańǵylyndaǵy 450, 452, 452/1, Jibek joly kóshesiniń buryshyndaǵy aýlalardy rekonstrýktsiialaýdyń barysyn qarap shyqty. «Biýdjetke qatysý» jobasy aiasynda aýdanda Áýezov pen Áiteke bi kósheleriniń qiylysyndaǵy A. Baitursynov atyndaǵy jáne «ARO» skverleri abattandyrylýda. Varlamov kóshesinde joba aiasynda skeit-park salyndy.
