Almaty qalasyndaǵy №2 perzenthanada jas ana qaitys boldy. 1996 jyly týǵan Kristina Iliýshenko 14 qarashada dúniege sábiin ákeldi. Alaida 3 jeltoqsanda ol sút bezderiniń qabynýy men laktostazǵa bailanysty aýrýhanaǵa qaita jatqan.9 jeltoqsan kúni tańerteń Kristina úiine shyǵýǵa daiyndalyp jatqan. Biraq bir sátte jaǵdaiy kúrt nasharlap, júregi toqtap qalǵan. Dárigerler jasaǵan qutqarý sharalary nátije bermei, jas anany aman alyp qalý múmkin bolmaǵan. Bul jaiynda bloger Aleksei Alekseev Facebook paraqshasynda málimdedi, dep habarlaidy Dalanews.kz.
Blogerdiń sózine súiensek, týystary sot-meditsinalyq saraptama qorytyndysyn áli almaǵan. Olar eshkimdi aiyptamaitynyn, tek oqiǵanyń ádil ári ashyq tergelýin talap etken.
“Kristina tek sút bezindegi qabyný úshin jatqyzylǵan edi, júrek aýrýy bolǵan emes. Shyǵýǵa daiyndalǵan kúni ol ajal qushty”, – deidi Kristinanyń ápkesi.
Aleksei Alekseev bul oqiǵany áleýmettik jelide jariialaǵan soń kóptegen áiel osy jáne ózge perzenthanalardaǵy jaǵdailardy bólise bastaǵan. Olar ai-kúni jaqyndaǵan analarǵa dárigerler dóreki ári salǵyrt qaraitynyn jetkizgen.
Málimetterge qaraǵanda, Qazaqstanda bir jasqa deiingi balalardyń ólim kórsetkishi 2023 jyly 6,88 paiyz boldy, bul 2 998 nárestege teń. Eýropalyq odaqta kórsetkish 3,33 %, AQSh-ta – 5,61 %, Reseide – 3,7 %, Japoniia men Sloveniiada – 1,7–2 %.
Qoǵam belsendileri jáne blogerler densaýlyq saqtaý ministrligin shuǵyl komissiia jiberip, Básenovadaǵy perzenthananyń jumysyn tekserýdi, sondai-aq qaladaǵy basqa perzenthanalardy reformalaýdy talap etýde.
Al Kristina Iliýshenkonyń jaqyndary men týystary sábidi óz qamqorlyqtaryna alatynyn málimdedi.
