الماتى قالاسىنداعى №2 پەرزەنتحانادا جاس انا قايتىس بولدى. 1996 جىلى تۋعان كريستينا يليۋششەنكو 14 قاراشادا دۇنيەگە ءسابيىن اكەلدى. الايدا 3 جەلتوقساندا ول ءسۇت بەزدەرىنىڭ قابىنۋى مەن لاكتوستازعا بايلانىستى اۋرۋحاناعا قايتا جاتقان.9 جەلتوقسان كۇنى تاڭەرتەڭ كريستينا ۇيىنە شىعۋعا دايىندالىپ جاتقان. ءبىراق ءبىر ساتتە جاعدايى كۇرت ناشارلاپ، جۇرەگى توقتاپ قالعان. دارىگەرلەر جاساعان قۇتقارۋ شارالارى ناتيجە بەرمەي، جاس انانى امان الىپ قالۋ مۇمكىن بولماعان. بۇل جايىندا بلوگەر الەكسەي الەكسەيەۆ Facebook پاراقشاسىندا مالىمدەدى، دەپ حابارلايدى Dalanews.kz.

بلوگەردىڭ سوزىنە سۇيەنسەك، تۋىستارى سوت-مەديسينالىق ساراپتاما قورىتىندىسىن ءالى الماعان. ولار ەشكىمدى ايىپتامايتىنىن، تەك وقيعانىڭ ءادىل ءارى اشىق تەرگەلۋىن تالاپ ەتكەن.

“كريستينا تەك ءسۇت بەزىندەگى قابىنۋ ءۇشىن جاتقىزىلعان ەدى، جۇرەك اۋرۋى بولعان ەمەس. شىعۋعا دايىندالعان كۇنى ول اجال قۇشتى”، – دەيدى كريستينانىڭ اپكەسى.

الەكسەي الەكسەيەۆ بۇل وقيعانى الەۋمەتتىك جەلىدە جاريالاعان سوڭ كوپتەگەن ايەل وسى جانە وزگە پەرزەنتحانالارداعى جاعدايلاردى بولىسە باستاعان. ولار اي-كۇنى جاقىنداعان انالارعا دارىگەرلەر دورەكى ءارى سالعىرت قارايتىنىن جەتكىزگەن.

مالىمەتتەرگە قاراعاندا، قازاقستاندا ءبىر جاسقا دەيىنگى بالالاردىڭ ءولىم كورسەتكىشى 2023 جىلى 6،88 پايىز بولدى، بۇل 2 998 نارەستەگە تەڭ. ەۋروپالىق وداقتا كورسەتكىش 3،33 %، اقش-تا – 5،61 %، رەسەيدە – 3،7 %، جاپونيا مەن سلوۆەنيادا – 1،7–2 %.

قوعام بەلسەندىلەرى جانە بلوگەرلەر دەنساۋلىق ساقتاۋ مينيسترلىگىن شۇعىل كوميسسيا جىبەرىپ، باسەنوۆاداعى پەرزەنتحانانىڭ جۇمىسىن تەكسەرۋدى، سونداي-اق قالاداعى باسقا پەرزەنتحانالاردى رەفورمالاۋدى تالاپ ەتۋدە.

ال كريستينا يليۋششەنكونىڭ جاقىندارى مەن تۋىستارى ءسابيدى ءوز قامقورلىقتارىنا الاتىنىن مالىمدەدى.