Almatynyń ortalyǵynda esirtki jarnamasyn boiaýǵa arnalǵan aýqymdy naýqan ótti,- dep habarlaidy Dalanews.kz
Almaty qalasynyń Almaly aýdanynda aýdan ákimdigi, "Narkostop" qoǵamdyq birlestigi, eriktiler men jastardyń belsendi qatysýymen qalalyq ortada esirtki nasihatyna qarsy baǵyttalǵan aýqymdy profilaktikalyq naýqan ótti.
Is-shara aiasynda ǵimarattardyń qasbetterinde, qorshaýlarda jáne basqa da infraqurylym nysandarynda anyqtalǵan esirtki graffitileri jedel túrde boialdy. Adamdar kóp jinalatyn oryndarda – kóshelerde, oqý oryndarynyń mańynda, saiabaqtar men aýlalarda profilaktikalyq jumystar júrgizildi. Turǵyndar arasynda, onyń ishinde jasóspirimder men jastar arasynda aqparattyq-túsindirý jumystaryna erekshe kóńil bólindi.
"Búginde jastardy esirtkige qarsy profilaktikalyq sharalarǵa tartý – asa mańyzdy. Jas almatylyqtar óz qoldarymen tyiym salynǵan zattardy nasihattaityn jazýlardy boiap jatqan kezde bul – aiqyn belgi: bizdiń qalamyz – esirtkige qarsy, biz jastardy táýeldiliktiń qurdymǵa aparar sheńberine tartýǵa jol bermeimiz. Esirtki jarnamasyn joiý jáne qoǵamdy esirtkige qarsy is-qimylǵa tartý jumystary Almatyda júieli túrde jalǵasyp keledi. Tek birlese áreket etý arqyly – politsiia, jergilikti bilik jáne azamattyq qoǵam seriktestigi arqyly biz qaýipsiz ári salaýatty qalalyq ortany qalyptastyra alamyz", - dedi Almaly aýdandyq politsiia basqarmasynyń bastyǵy Maqsat Pshan.
Spikerdiń aitýynsha, mundai is-sharalar esirtki qylmysyna qarsy kúreste profilaktikalyq baǵytty kúsheitýge jáne azamattardyń belsendi ómirlik ustanymyn qalyptastyrýǵa baǵyttalǵan.
