Kezdesý barysynda oblys ákimi Amandyq Batalov oblysta ınvestısıa tartý baǵytynda atqarylyp jatqan jumystarǵa qysqasha toqtalyp ótti. «Qorǵas» HSHYO men «Qorǵas – Shyǵys qaqpasy» AEA bazasynda, óńirdiń aýdan, qalalarynda qurylǵan ındýstrıaldy aımaqtar men ónerkásip alańdaryna ınvestısıalyq jobalardy ornalastyrý múmkindikteri jaıly aıtyp berdi.
- Almaty oblysy - ınvestısıalyq jaǵynan tartymdy aımaq. Bul onyń aýmaqtyq ári tabıǵı-klımattyq turǵydaǵy ereksheligine baılanysty, sonymen qatar kólik dálizderin damytý jáne ınvestısıa tartýǵa jasalǵan jaǵdaılar men is-sharalardyń nátıjesi. Investorlarmen júrgizilgen jumystyń arqasynda ótken jyldyń ózinde 25 myń jumys orny ashyldy, - dedi A. Batalov.
Munan soń «KAZAKH INVEST» UK» AQ qyzmetiniń jáne óńirlik dırektorlar keńesiniń jergilikti atqarýshy organdarmen ózara qarym-qatynas júıesiniń tanystyrylymyn aksıonerlik qoǵamnyń basqarma tóraǵasynyń orynbasary Birjan Qaneshev baıandady. Onyń aıtýynsha, «KAZAKH INVEST» UK» AQ Memleket basshysynyń tapsyrmasy boıynsha Qazaqstan Respýblıkasy Úkimetiniń qaýlysymen Qazaqstan Respýblıkasyna sheteldik ınvestorlardy tartý jónindegi operator retinde qurylǵan. Kompanıanyń basty mindetteriniń biri – Óńirlik ınvestısıa kartasyn qalyptastyrý, árbir aımaqtyń spesıfıkalyq erekshelikterin esepke ala otyryp, ınvestorlarmen jeke jumys júrgizý ekenin de atap ótti. Osy maqsatta Taldyqorǵan qalasynda jergilikti jerlerdegi ınvestorlarmen jumys isteý úshin kompanıanyń ókildigi ashylmaq.
Jıyndy qorytyndylaǵan oblys ákimi A. Batalov Almaty oblysy «KAZAKH INVEST» UK» AQ ókilderimen birlese otyryp Memleket basshysynyń mańyzdy tapsyrmalarynyń biri ınvestısıa tartýda aıtýly nátıjelerge qol jetkizetindikterine senim bildirdi.
Osy kúni resmı delegasıa Almaty oblysyna jasaǵan sapary barysynda ınvestorlarmen kezdesip, Almaty oblystyq Aımaqtyq damý ortalyǵynyń, «Jetisý» ÁKK» AQ, Taldyqorǵan qalasyndaǵy HQO janyndaǵy ınvestorlarǵa qyzmet kórsetý ortalyǵynyń jumysymen tanysty, sol sıaqty «Taldyqorǵan» ındýstrıaldy aımaǵynda boldy.
Jalpy, qazirgi kezde aımaqta jalpy ınvestısıa kólemi 530,9 mlrd. teńge bolatyn, 10 myń jumys ornyn qurýǵa múmkindik beretin 63 ınvestısıalyq joba júzege asyrylýda. Bulardyń qatarynda «Mareven Fýd Tán-SHan» JSHS, «LÝKOIL Lýbrıkants Ortalyq Azıa» JSHS, «Nemish Pharma» JSHS, «Baýman» JSHS, «Farm Frites» JSHS sıaqty iri transulttyq kompanıalardyń qatysýymen júzege asyrylatyn 9 joba bar.
