30 naýryzda İle aýdany Baıkent aýylyndaǵy "Voroshılov" sý qoımasynyń bógeti jaryldy. Jarylǵan jerdiń eni shamamen 5 metrdi qurady. Óńir basshysy Marat Sultanǵazıev apatqa qarsy kúres boıynsha qabyldanǵan sharalar týraly baıandady.
– Sý qoımasyndaǵy 700 myń tekshe metr sý kólemin eskere otyryp, turǵyn úı sektoryn sý basýǵa jol bermeý boıynsha jumystar júrgizildi. "Jarmuhamet" ózeniniń negizgi arnasy boıynsha sý aǵynyn "Amangeldi 1" jáne "Amangeldi 2" toǵandaryna, sodan keıin "Qaskeleń" ózeni arqyly "Qapshaǵaı sý qoımasyna" baǵyttaý úshin barlyq qajetti sharalar qabyldandy. Sý tasqynynyń saldaryn jeńildetý úshin Qaraoı aýylyndaǵy "Ýtánkı" kólinen sý aǵyzyldy, – dedi Marat Sultanǵazıev.
Barlyǵy 17 adam evakýasıalandy. Osy qaýipke oraı ózen aǵysyn kedergilerden tazartyp, Amangeldi toǵanynyń jaǵalaýyn nyǵaıtý jumystary júrgizilgen.
Bul sharalar turǵyndardy qorǵaýǵa jáne sý tasqynyna yqtımal apattardyń aldyn alýǵa baǵyttalǵan. Bul mindetti iske asyrý úshin aıtarlyqtaı resýrstar tartyldy: qorǵanys qurylystaryn nyǵaıtý jáne jaǵalaý boıynyń qaýipsizdigin qamtamasyz etý úshin 1200 tonna ınertti materıal jetkizildi, sondaı-aq tıimdi nyǵaıtý jáne qorǵaý úshin ınertti materıaly bar 4000 qapshyq tóseldi.
Aımaq halqy ózderiniń birligin kórsetti. Eriktiler men uıymdar, sonyń ishinde "Jaqsylyq sáýlesi" jáne "Amelı qory" azyq-túlikpen qamtamasyz etip, ony taratýǵa kómektesti. Jergilikti turǵyndar, sonyń ishinde áıelder men qyzdar ystyq tamaq daıyndady, al "Dám fabrıkasy" ystyq taǵamdardy jetkizdi. Jergilikti turǵyndar arasynan shyqqan erler men jas jigitter qumdy qaptarǵa salyp, qorshaýlar ornatýmen belsendi aınalysty. İle aýdanynyń Jastar ortalyǵy da azyq-túlik taratýǵa jáne qumdy oraýǵa úles qosty.
Barlyq qyzmetterdiń jedel reaksıasy men shtabty tıimdi uıymdastyrýdyń arqasynda qabyldanǵan sheshimder qurbandar men múliktiń joǵalýyn boldyrmaýǵa múmkindik berdi. Almaty oblysynyń basshylyǵy sharanyń barlyq qatysýshylaryna janashyrlyǵy men úılesimdi jumysy úshin alǵys bildiredi.
